هیومان ڕایتس وۆچ داوای هەڵدانەوەی گۆڕە بەکۆمەڵەکان لە عێراق دەکات

ئاڤا نیوز  

ڕێکخراوی هیومان ڕایتس وۆچ، داوا لە حکومەتی عێراق دەکات لەپێناو بەدیهێنانی دادپەروەری بۆ کەسوکاری قوربانییەکان، دەست بە هەڵدانەوەی گۆڕە بە کۆمەڵەکانی سەردەمی بەعس و ڕێکخراوی داعش بكات.

وێنە گەورەکە: عێراق بەیەکێک لەو وڵاتانە دادەنرێت کە زۆرترین گۆڕی بە کۆمەڵی لە ئاستی جیهان تێدایە، ژمارەکەیان بە زیاتر لە 288 گۆڕی بە کۆمەڵ مەزەندە دەکرێت و ژمارەیەکی کەمیان هەڵدراونەتەوە.

ئەوەی پێویستە بیزانیت: ناوەندی ستراتیژی بۆ مافەکانی مرۆڤ لە عێراق دەڵێت، لەناو ئەو گۆڕە بە کۆمەڵانەدا 250 هەزار تا ملیۆنێک مرۆڤ کۆمەڵکوژکراون.

ڕاگەیێنراوی فەرمی: ڕێکخراوی هیومان ڕایتس وۆچ لەدواین ڕاپۆرتیدا بڵاویكردەوە: "لەگەڵ کۆتاییهاتنی ئەرکی تیمی نەتەوە یەکگرتووەکان  (یونیتاد) مەترسی ئەوەمان هەیە عێراق ئەو بۆشاییە پڕنەکاتەوە کە یونیتاد جێیدەهێڵێت، لە کۆکردنەوەی دۆسیەی بەڵگەنامەکانی تایبەت بە تاوانەکانی داعش و بەعس".

زانیاریی زیاتر: "بۆ دادپەروەری و ساڕێژبوونی برینی کەسوکاری قوربانییەکان، پێویستە حکومەتی عێراق هەوڵەکانی چڕبکاتەوە بۆ هەڵدانەوەی گۆڕە بە کۆمەڵەکان، دیاریکردنی ناسنامەی قوربانییەکان، گەڕانەوەی ڕووفاتەکان بۆ شوێنی خۆیان و قەرەبووکردنەوەی کەسوکاریان".