کێشەی هەناردەکردن لە هەرێمی کوردستانەوە  بۆ عێراق چارەسەر دەکرێت

ئاڤا نیوز

 

هەولێر و بەغدا لە گفتوگۆدان بۆ چارەسەرکردنی کێشەی هەناردەکردنی کاڵا و بەرهەم لە هەرێمی کوردستانەوە بۆ بازاڕەکانی ناوەڕاست و باشووری عێراق  و لێکتێگەیشتن لەسەر سێ خاڵ کراوە.

 

وێنە گەورەکە: سەرەتای ئەم مانگە بۆ ماوەی هەفتەیەک ڕێگاکانی عێراق بەڕووی هەناردەکردنی کاڵا و بەرهەم لە هەرێمی کوردستانەوە داخران، ئەمەش بەهۆی بڕیارێکی حکومەتی فیدراڵی بەوەی دەبێت سەرجەم کۆمپانیاکان مۆڵەتی ئەوێیان هەبێت، دوای کۆبوونەوەیەکیش ڕێگاکان تا 01-09-2024 کرانەوە.

 

ئەوەی پێویستە بیزانیت: شاندی هەرێمی کوردستان کە لە نوێنەرانی وەزارەتەکانی ناوخۆ و بازرگانی و پیشەسازی پێکهاتبوو، ڕۆژی 6ی ئەم مانگە لەگەڵ شاندێکی عێراق بە بەشداریی سامی سوودانی؛ ڕاوێژکاری سەرۆکوەزیرانی عێراق، بەڕێوەبەری گشتیی گەشەپێدانی پیشەسازی و بەرپرسی گومرگەکانی باکوور کۆبوونەوە.

 

لێدوانی فەرمی: د.سامی جەلال، ڕاوێژکاری وەزیری ناوخۆ و ئەندامی شاندەکە بە ئاڤا نیوزی گوت، "هەردوولا تاوەکو سەرەتای مانگی داهاتوو کۆبوونەوەیەکی دیکە دەکەن، ڕەشنووسێکی سێ خاڵی لەبارەی مۆڵەتی کۆمپانیاکان ئامادەکراوە و واژۆ دەکرێت".

 

ڕێککەوتنەکە بەمشێوەیە: گرنگترین  خاڵەکانی ڕەشنووسەکە بریتین لە:

 

 1. ئەو کۆمپانیایانەی لە هەرێمی کوردستان مۆڵەتیان هەیە، لەلایەن حکومەتی فیدراڵییەوە دانیان پێدا دەنرێت، بەپێچەوانەشەوە ئەو کۆمپانیایانەی لە عێراق مۆڵەتیان هەیە دەتوانن بەرهەمەکان هەناردەی هەرێمی کوردستان بکەن.

 

2.⁠ ⁠کۆمپانیا پیشەسازییەکانی هەرێمی کوردستان لە سەکۆی بانکی ناوەندیی تۆماردەکرێن، بۆ ئەوەی بتوانن بە نرخی فەرمی لە دۆلار سوودمەند بن کە 132 هەزار دینارە بۆ هەر 100 دۆلارێک.

3.⁠ ⁠ناو و زانیاریی کۆمپانیا ناوخۆییەکان و کۆمپانیاکانی عێراق لە داتابەیسدا تۆماردەکردێن، بۆ ئەوەی لە دەروازەکاندا تووشی ڕێگری نەبن.

 

ئەمەش بزانە: نزیکەی 70%ی ئەو بەرهەمانەی هاوردەی هەرێمی کوردستان دەکرێن، لەگەڵ ئەو بەرهەمە جۆراوجۆرانەی لە کۆمپانیا و کارگەکانی هەرێمی کوردستان بەرهەم دەهێنرێن، لە بازاڕی پارێزگاکانی ناوەڕاست و خوارووی عێراق ساغدەکرێنەوە.