عەزم و سیادە پشتیوانی بۆ مەحموود مەشهەدانی ڕادەگەیێنن

ئاڤا نیوز

هەردوو هاوپەیمانی عەزم و سیادەی سوننەکان، پشتیوانی خۆیان بۆ مەحموود مەشهەدانی ڕاگەیاند بۆ وەرگرتنی پۆستی سەرۆکی پەرلەمانی عێراق.

وێنە گەورەکە: دوای ئەوەی چوارچێوەی هەماهەنگی ڕەتیکردەوە پەیڕەوی ناوخۆی پەرلەمان هەمواربکرێت و بەربژێری دیکە بۆ پۆستی سەرۆکی پەرلەمان زیاد بکرێن، ئێستا هەریەک لە مەحموود مەشهەدانی و سالم عیساوی کێبڕکێ لەسەر پۆستی سەرۆکی پەرلەمان دەکەن.

ڕاگەیێنراوی فەرمی: هەردوو هاوپەیمانیی عەزم و سیادە لە ڕاگەیێنراوێکی هاوبەشدا دەڵێن، بڕیارەکەیان لە چوارچێوەی وەڵامدانەوەی هێزە نیشتیمانییەکاندا بووە کە داوایان دەکرد کێشەی سەرۆکی پەرلەمان بەخێرایی چارەسەر بکرێت.

لەلایەکی دیکەوە: دوێنێ شەش لایەنی تری سوننی ڕایانگەیاند، واژۆی 55 پەرلەمانتاری سوننەیان کۆکردووەتەوە و دەیانەوێت بەربژێرێکی نوێ‌ بۆ پۆستی سەرۆکی پەرلەمان پێشکەش بکەن، بەبێ ئەوەی ناوی بەربژێرە نوێیەکەیان ئاشکرا بکەن.

باکگراوند: لەدوای دوورخستنەوەی محەممەد حەلبووسی لە مانگی 11ی ساڵی ڕابردوو لەلایەن دادگەی باڵای فیدراڵی، پەرلەمانی عێراق بێ سەرۆکە و دوای چەندین دانیشتن و دووجار دەنگدان تاوەکو ئێستا نەتوانراوە پۆستەکە پڕبکرێتەوە.