عێراق لەبارەی زیادبوونی قەرزە ناوخۆییەکانی ڕوونکردنەوە دەدات

ئاڤا نیوز

ڕاوێژکاری ئابووریی سەرۆکوەزیرانی عێراق ڕایدەگەیێنێ، ئەمساڵ حکومەت بۆ پڕۆژەکانی وەبەرهێنان و ژێرخان پێویستی بە پارە هەبووە و قەرزی کردووە، بەوهۆیەش قەرزی ناوخۆیی دەوڵەت بۆ 78 تریلیۆن دینار زیادی کردووە.

وێنە گەورەکە: بەپێی ڕاپۆرتێکی دامەزراوەی عێراقی ئایندە بۆ ڕاوێژی ئابووری، قەرزە ناوخۆییەکانی عێراق لە نیسانی ئەمساڵ 76 تریلیۆن و 976 ملیار دینار بووە. لەکاتێکدا لە نیسانی ساڵی 2023دا 69 تریلیۆن و 720 ملیار دینار بووە.

لێدوانی فەرمی: مەزهەر محەممەد ساڵح، ڕاوێژکاری ئابووریی سەرۆکوەزیرانی عێراق لە چاوپێککەوتنێکدا ڕایگەیاند، زۆرترین قەرزی ناوخۆیی لە ساڵانی 2014 – 2017دا کراون، ئەویش بەهۆی دابەزینی نرخی نەوت و شەڕی دژی داعش لەوکاتەدا، بڕەکەشی بریتی بووە لە 27 تريليۆن دينار، هاوکات لە ساڵانی 2020 و 2021یش بەهۆی کۆرۆناوە حکومەت دووبارە قەرزی کردووە.

هۆکارە زانراوەکان: بەگوتەی ڕاوێژکارەکەی سوودانی، هۆکاری زیادبوونی قەرزە ناوخۆییەکانی عێراق بۆ ئەوە دەگەڕێتەوە، ئەمساڵ حکومەت بۆ پڕۆژەکانی وەبەرهێنان و پڕۆژەکانی ژێرخان پێویستی بە پارە بووە، جەختیش دەکاتەوە ئێستا پلانێک هەیە بۆ ئەوەی وەرگرتنی قەرز کەمبکرێتەوە  و ئەو قەرزانەشی ماون، لەکاتی خۆیان و بەبێ دواکەوتن بدرێنەوە.