بەرپرسێکی پارتی: ڕێبوار تەها کار بۆ سەرخستنی ماددەی 140 بکات پشتگیری دەکەین

ئاڤا نیوز

بەرپرسێکی باڵای پارتی  بە ئاماژەکردن بەوەی لایەنێکی سیاسی بە تەنیا ناتوانێت پارێزگاری لە کەرکووک بکات، دەڵێت: "پشتگیری پارێزگاری نوێی کەرکووک دەکەین، بەڵام بە مەرجێک ئەگەر ڕێگری لە تەعریب و سەرخستنی ماددەی 140 بکات."

وێنە گەورەکە: هەڵبژاردنی ڕێبوار تەها لە پشکی یەکێتی وەک پارێزگاری کەرکووک و دابەشکردنی پۆستەکانی پارێزگاکە کاردانەوە و ناڕەزایەتی بەشێک لە لایەنەکانی لێکەوتووەتەوە، پارتیش یەکێکە لەو لایەنانەی لە ڕێککەوتنی پێکهێنانی حکومەتی خۆجێیی کەرکووک بەشدار نەبووە.

لێدوانی فەرمی:  عەلی حوسێن، ئەندامی مەکتەبی سیاسیی و بەرپرسى مەکتەبى ڕێکخستنى سلێمانى – هەڵەبجەی پارتی، لە کۆنگرەیەکی ڕۆژنامەوانیدا ڕایگەیاند، "ئەگەر پارێزگاری کەرکووک بتوانێت پرۆسەی تەعریب ڕابگرێت و ماددەی 140 سەربخات پشتگیری لێ دەکەین."

باکگراوند: پێشتر پارتی ڕێککەوتنی یەکێتی لەگەڵ بەشێک لە لایەنەکان بۆ دابەشکردنی پۆستەکان بە  نایاسایی ناوبردبوو، مەحموود محەممەد، گوتەبێژی پارتی ڕایگەیاند یاسایی نییە و گرفتی هەیە.