تەشەنەسەندنی هەژاری لە تورکیا دەبێتە مانشێتی رۆژنامە بەناوبانگەکان

ئاڤا نیوز

 

دانیشتووانی تورکیا لە نێوان بەرداشی برسیێتی و هەژاری گیریان خواردووە، '17 ملیۆن هاووڵاتی تورکیا پێویستیان بە هاوکارییە' مانشێتی سەرەکیی رۆژنامەی یەنیچاغی تورکییە.

 

وێنە گەورەکە: دەیان ملیۆن کەس لە تورکیا کەوتوونەتە ژێر هێڵی هەژارییەوە. سەرەڕای ئەوەی وەزارەتی خێزان و خزمەتگوزاری کۆمەڵایەتی داتاکانی ئۆپۆزیسیۆن رەتی دەکاتەوە، کە خەڵکانێک هەبن لەژێر هێڵی هەژاریدا بن. بەڵام بە گوێرەی داتاکانی وەزارەتەکە، لە پێنج مانگی یەکەمی ئەمساڵدا، زیاتر لە 4.235 ملیۆن خێزان سوودمەندی هاوکارییەکان بوونە، ئەو ژمارەیەش بەراورد بە مانگی کانوونی دووەمی ئەمساڵ 498 هەزار خێزان زیادی کردووە. 

 

زانیاریی زیاتر: ژمارەی ئەو خێزانانەی پێویستییان بە هاوکارییە، تەنیا لە شەش مانگی رابردوو 500 هەزار زیادی کردووە. رۆژنامەی یەنیچاغ نووسیویەتی "تورکیا بووەتە وڵاتی ئەوانەی پێویستییان بە هاوکارییە".

 

ژمارەکان وادەڵێن: بە گوێرەی داتاکانی ئۆپۆزیسیۆن 80%ـی دانیشتووانی تورکیا لە نێوان هەژاری و برسیێتی گوزەران دەکەن، کەمترین ئاستی هەژاری لە مانگی تەمموزدا بە داهاتی مانگەی 19 هەزار لیرە دیاریکراوە.

 

ئەوەی پێویستە بیزانیت: بە گوێرەی داتاکانی دەزگای ئاماری تورکیا، رێژەی هەڵاوسان لە وڵاتەکە لە مانگی تەمموز بۆ 67.78% دابەزیوە. لەلایەکی دیکەشەوە بەهای دۆلارێکی ئەمریکی لەسەرووی 33 لیرەوە مامەڵەی پێوە دەکرێت، کە داکەوتنی بەهای دراوەکە گوزەرانی هاووڵاتیانی سەخت کردووە.