سەرۆککۆماری عێراق دەستبەکاربوونی پارێزگارێک پەسند ناکات

ئاڤا نیوز

 

عەبدولـلەتیف ڕەشید، سەرۆککۆماری عێراق دەستبەکاربوونی 12 پارێزگاری عێراقی پەسەند کرد، جگە لە پارێزگاری سەڵاحەددین، بەگوتەی ئەندامێکی ئەنجوومەنی پارێزگاکە دواخستنی پەسەندنەکردنی بۆ سکاڵایەکی چوارچێوەی هەماهەنگی دەگەڕێتەوە.

 

وێنە گەورەکە: ڕۆژی 04-02-2024، لە کۆبوونەوەی ئەنجوومەنی پارێزگای سەڵاحەددین ئەحمەد جبووری بە زۆرینەی دەنگ وەک پارێزگار و عەلی ئەیمەن شوکر وەک جێگری پارێزگار و تارق فەهد وەک جێگری تەکنیکی هەڵبژێردران، بەڵام لەلایەن سەرۆککۆمارەوە پەسەند نەکرا.

 

زانیاریی زیاتر: عەبدولـلەتیف ڕەشید، سەرۆککۆماری عێراق فەرمانی دانانی پارێزگارەکانی بەغدا، بەسرە، نەینەوا، بابل، کەربەلا، واست، زی قار، نەجەف، ئەنبار، موسەننا، میسان، دیوانیەی پەسەندکرد، جگە لە پارێزگای سەڵاحەددین. 

 

لێدوانی فەرمی: یاسین محەممەد، ئەندامی ئەنجوومەنی پارێزگای سەڵاحەددین بۆ ئاڤا نیوز گوتی: هۆکاری دواخستی ئەو پڕۆسەیە بۆ سکاڵایەکی چوارچێوەی هەماهەنگی دەگەڕێتەوە، چونکە لە سکاڵاکە نووسیویانە ڕێژەی یاسایی تەواو نەبووە و دەنگدان کراوە، بەڵام ئەمە تەنیا بیانووە، پرۆسەکە تەواو یاسایی بووە.

 

ئەوەی پێویستە بیزانیت: چوارچێوەی هەماهەنگی سێ کورسی پارێزگای سەڵاحەددینی هەیە، کورد خاوەنی یەک کورسییە کە بەر یەکێتیی نیشتمانی کوردستان کەوتووە.