نزیکەی دوو ملیۆن و نیو زیارەتکار هاتوونەتە عێراق

ئاڤا نیوز  

وەزارەتی ناوخۆی عێراق، نوێترین ئاماری هاتنی زیارەتکارانی لە دەروازە سنوورییەکانی عێراق بڵاوکردەوە و ڕایگەیاند، ژمارەکە گەیشتووەتە دوو ملیۆن و 400 هەزار زیارەتکار. 

وێنە گەورەکە: بەبۆنەی چلەی ماتەمینی ئیمام حوسێن، لە سەرەتای هەفتەی داهاتوودا ملیۆنان زیارەتکاری شیعەمەزهەبی عێراقی و بیانی سەردانی مەزارگەی ئیمام حوسێن دەکەن لە شاری کەربەلا، ئەوەش بە یەکێک لە گرنگترین ڕووداوەکان لە مەزهەبی شیعە دادەنرێت.

ڕاگەیێنراوی فەرمی: لیژنەی باڵای زیارەتکارانی چلەی ئیمام حوسێن بڵاویکردەوە، تا ئەمڕۆ دووشەممە دوو ملیۆن و 400 هەزار زیارەتکار هاتوونەتە عێراق و 844 هەزار زیارەتکاریش بۆ وڵاتەکانی خۆیان گەڕاونەتەوە.

ژمارەکان وادەڵێن: لە سەرەتای دەستپێکردنی رێوڕەسمەکانی زیارەتی چلەی ئیمام حوسێن، 28 هەزار و 615 سزای سەرپێچیی ئۆتۆمبێل تۆمارکراون، لە هەفتەی ڕابردووشدا، 39 ڕووداوی هاتووچۆ روویانداوە و لە ئەنجامدا نۆ کەس گیانیان لەدەستداوە.