خوێندنەوە بۆ هەڵوەشاندنەوەی بڕیارێکی سەردەمی بەعس دژی کورد و تورکمان دەکرێت

ئاڤا نیوز 

 

لە بڕگەی دووەمی کارنامەی دانیشتنی ئەنجوومەنی نوێنەرانی عێراق، خوێندنەوەی یەکەم بۆ هەڵوەشاندنەوەی بڕیارێکی ڕژێمی بەعس دەکرێت کە پەیوەستە بە دۆخی کورد لە ناوچە کوردستانییەکانی دەرەوەی ئیدارەی هەرێمی کوردستان.

 

وێنە گەورەکە: لە کۆبوونەوەی رۆژی چوارشەممەی ئەنجوومەنی نوێنەرانی عێراق، خوێندنەوەی یەکەم بۆ هەڵوەشاندنەوەی بڕیارەکانی 1018ـی ساڵی 1982 و (554)ی ساڵی 1983ی سەردەمی ڕژێمی بەعس دەکرێت و پرۆژە یاسای هەڵوەشاندنەوەی هەردوو بڕیارەکە، ئەنجوومەنی وەزیرانی عێراقی تێپەڕاندووە و تەنیا لە ئەنجوومەنی نوێنەران ماوە تێپەڕێنرێت.

 

بۆچی گرنگە: بە تێپەڕاندنی ئەو پڕۆژە یاسایە، نزیکەی 300 هەزار دۆنم زەوی بۆ هاووڵاتییانی کورد و تورکمان دەگەڕێتەوە لەو موڵکانەی لەلایەن عەرەبی هاوردەوە لە سنووری پارێزگای کەرکووک و چەند ناوچەیەکی دیکەی کوردستانیی دەرەوەی ئیدارەی هەرێمی کوردستان داگیرکراون.

 

لێدوانی فەرمی: نەجوە کاکەیی، ئەندامی ئەنجوومەنی نوێنەرانی عێراق بە ئاڤا نیوزی گوت، "ئەم بڕیارە لە خولەکانی پێشوو بە بیانووی جیاواز هەڵنەوەشێنراوەتەوە، مانەوەی ئەو بڕیارە وەک خۆی، کاریگەری دەخاتە سەر بژێویی دەیان خێزان."