هاوپەیمانیی ئاوەدانکردنەوە و گەشەپێدان جەخت لە گرنگی گفتوگۆی سیاسی دەکاتەوە

ئاڤا نیوز

هاوپەیمانیی ئاوەدانکردنەوە و گەشەپێدان، جەخت لە گرنگیی بەردەوامبوونی گفتوگۆ سیاسییەکان و پابەندبوون بە وادە دەستوورییە دیاریکراوەکان بۆ پێکهێنانی حکومەت دەکاتەوە.

ئەوەی پێویستە بیزانیت: ڕۆژی یەکشەممە 14-12-2025، دادگەی باڵای فیدراڵیی عێراق بەگوێرەی ماددەی 93ـی دەستوور ئەنجامی کۆتایی هەڵبژاردنەکانی 11ـی 11ـی پەسەند کرد.

چیرۆکی سەرەکی: ئەمڕۆ دووشەممە، هاوپەیمانیی ئاوەدانکردنەوە و گەشەپێدان بە سەرۆکایەتی محەممەد شیاع سوودانی، ئەمینداری ڕەوتی فوراتەین کۆبووەوە، بۆ تاوتوێکردنی ئەنجامی گفتوگۆ سیاسییەکان لەگەڵ کوتلە و هێزە نیشتمانییەکان و لێکۆڵینەوە لە نوێترین پێشهاتەکانی گۆڕەپانی سیاسیی وڵات.

ڕاگەیێنراوی فەرمی: بەگوێرەی ڕاگەیێنراوی ڕەوتی فوراتەین، بەشداربووان لە کۆبوونەوەکەدا جەختیان لە گرنگیی بەردەوامبوونی گفتوگۆ سیاسییەکان بە شێوەیەکی خولی و ڕێک و پێک کردەوە. هاوکات ستایشی پەسەندکردنی ئەنجامی کۆتایی هەڵبژاردنەکانی ئەنجوومەنی نوێنەرانی عێراقی لەلایەن دادگای باڵای فیدراڵییەوە کرد.

لەهەمان کاتدا: کۆبوونەوەکە جەختی لە پابەندبوون بە وادە دەستوورییە دیاریکراوەکان بۆ تەواوکردنی شایستە سیاسییەکان کردەوە و ئامادەبووان ئاماژەیان بەوەدا کە بەردەوامبوونی گفتوگۆ و ڕاوێژ لەنێوان سەرکردە سیاسییەکاندا یارمەتیدەرە بۆ دروستکردنی کەشێکی ئەرێنی لەسەر بنەمای متمانەی هاوبەش و زەمینەیەکی پتەو بۆ هاوکارییەکی بونیادنەر لە پرسە نیشتمانییە جیاوازەکاندا کە خزمەت بە بەرژەوەندییەکانی عێراق دەکات.