لە کەربەلا شەڕەتەقە لە نێوان حەشدی شەعبی و سوپای عێراق ڕووی دا

ئاڤا نیوز 

 

بەرەبەیانی ئەمڕۆ لەنێو ئاپۆرای زیارەتکارانی چلەی ئیمام حوسێن لە کەربەلا، شەڕەتەقە لەنێوان هێزەکانی حەشدی شەعبی و هێزەکانی سوپای عێراق ڕووی دا.

 

وێنە گەورەکە: بەبۆنەی چلەی ماتەمینی ئیمام حوسێن، ملیۆنان زیارەتکاری شیعە مەزهەبی عێراقی و بیانی سەردانی مەزارگەی ئیمام حوسێن دەکەن لە شاری کەربەلا، پاراستنی ئاسایشی ئەو زیارەتکارانەش خراوەتە ئەستۆی هێزە ئەمنییەکانی عێراق.

 

زانیاریی بەدەستهاتوو: ئەفسەرێکی سوپای عێراق بە ئاڤا نیوزی ڕاگەیاند: گرووپێک لە ئەندامانی حەشدی شەعبی "گرووپی جوندولئیمام" هەوڵیان داوە بە چەکەوە لە خاڵێکی پشکنین بپەڕنەوە و بچنە ناو کەربەلا".

 

زانیاریی زیاتر: بە گوتەی ئەو سەرچاوەیە کە ناوەکەی ئاشکرا نەکردووە ئاماژەی بەوە کرد لە ئەنجامی ڕێگریکردن لەو گرووپە چەکدارییە لەلایەن هێزەکانی سوپای عێراقەوە، شەڕ لەنێوان ئەو دوو هێزە دروست دەبێت و هێزەکانی جوندولئیمام تەقە بەرەو ڕووی هێزەکانی سوپای عێراق دەکەن

 

ئەوەی پێویستە بیزانیت: لیواکانی جوند ئیمام یەکێکە لە گرووپە چەکدارەکانی سەر بە هێزەکانی حەشدی شەعبی، ساڵی 2014 بە فەرمانی ئەحمەد ئەسەدی، وەزیری ئێستای کار و کاروباری کۆمەڵایەتی دامەزراوە وەکو باڵی سەربازی بزووتنەوەی ئیسلامی لە عێراق.

 

لەلایەکی دیکەوە: دوای ئاڵۆزبوونی شەڕەکە، هێزێکی ئەمنی لە سوپا و حەشد دەستوەرانیان کرد و شەڕکەرەکانیان دەستگیرکردن، دواتر بەهۆی ئەوەی شەڕەکە زیانی گیانی نەبوو، شەڕکەرەکان ئازاد کران.