لە بەغدا یەکەم فێستیڤاڵی نێودەوڵەتیی فیلم لەبارەی جینۆساید سازدەکرێت

ئاڤا نیوز

 

دوای چوار ساڵ ئامادەکاری، فێستیڤاڵێکی نێودەوڵەتیی فیلم لە بەغدا سازدەکرێت و تێیدا 12 فیلمی ئەنیمەیشن، کورتەفیلم و فیلمی دۆکیۆمێنتاری نمایش دەکرێن، فێستیڤاڵەکە دەربارەی ئەو کارەساتانەیە کە بەسەر کوردانی فەیلیدا هاتوون.

لێدوانی فەرمی: پشتیوان عەبدوڵڵا بەڕێوەبەری فێستیڤاڵەکە بە ئاڤا نیوزی ڕاگەیاند: "هەرچەندە تاوەکو ئێستا هیچ فیلمێک لەبارەی ئەو ڕووداوانەوە بەرهەم نەهێنراوە کە بەسەر فەیلییەکاندا هاتوون، بەڵام ئێمە بۆ فێستیڤاڵەکە خۆمان دەبینە بەرهەمهێنەر و 12 فیلم دروست دەکەین و خەڵاتیش بەسەر براوەی باشترین فیلمەکاندا دابەش دەکەین".

زانیاریی زیاتر: جگە لە نمایشکردنی فیلمەکان، پێشانگەیەکی کتێب دەکرێتەوە و چەند کتێبێک دەربارەی جینۆساید چاپ دەکرێن. دوای تەواوبوونی فێستیڤاڵەکە فیلمەکان لە شاری هەولێریش نمایش دەکرێن.

بۆچی گرنگە: ئامانج لە ڕێکخستنی فێستیڤاڵەکە لە بەغدا وەبیرهێنانەوەیە بۆ ئەو کارانەی دەسەڵاتدارانی ڕژێمی پێشووی بەعسی عێراق بەرامبەر کوردانی فەیلی کردیان، پشتیوان عەبدوڵڵا دەڵێت  ناسنامەیان ون بووە و ئەوان دەیانەوێت بە سینەما ئەو پەیامە بگەیێنن.