لە پێنج مانگدا عێراق مۆڵەتی کارکردنی بە 196 هەزار کرێکاری بیانی داوە

ئاڤا نیوز

 

حکومەتی عێراق تەنیا لە پێنچ مانگی سەرەتای ئەمساڵدا مۆڵەتی کارکردنی بە 196 هەزار کرێکاری بیانی داوە لە کۆمپانیاکانی نەوتی باشوور.

 

وێنە گەورەکە: ژمارەی کرێکارانی بیانی لە عێراق بەشێوەیەکی بەرچاو زیادی کردووە. کە بەپێی ئامارە نا فەرمییەکان, زیاتر لە یەک ملیۆن کرێکار لە عێراق هەیە کە  ئاڵنگاریی زۆری بۆ حکومەت و دەرفەتی کاری خۆماڵی دروست کردووە. 

 

لێدوانی فەرمی: د. نەبیل مەرسومی، شارەزای ئابووریی عێراق بە ئاڤا نیوزی ڕاگەیاند: لە ماوەی پێنچ مانگی سەرەتای ئەمساڵدا حکومەتی عێراق مۆڵەتی کارکردنی بە 196 هەزار و 704 کرێکاری بیانی داوە بۆ کارکردن لە کۆمپانیاکانی نەوتی باشوور.

 

زانیاریی زیاتر: "ئەو کرێکارانە لە 50 وڵاتەوە هاتوون،  کە 53 هەزاریان چینیین، 22 هەزاری هیندین و 21 هەزاریش پاکستانین و زۆربەیان ئاستی لێهاتوویی و توانایان کەمە". نەبیل مەرسومی واشی گوت.

 

کاریگەریی و لێکەوتەکانی: بەپێی نەبیل مەرسوومی، زۆربوونی کرێکارانی بیانی کاریگەریی لەسەر دەرفەتی کاری نێوخۆیی هەیە و بەشێکیان کێشەی ئەمنیی دروست دەکات.

 

چارەسەرکان: بەپێی نەبیل مەرسوومی،  پێویستە کۆمەڵێک ڕێکار  بۆ چارەسەرکردنی کێشەکە بگیرێتە بەر لەوانە؛ ڕێکخستنەوەی دۆسیەی کرێکارانی بیانی و دوورخستنەوەی ئەوانەی مۆڵەتیان نییە. هەروەها سەپاندنی باج، و تەنیا ڕێگە بەو کرێکارانە بدرێت کە پێویستن و خاوەن لێهاتوویین، بەپێی نەبیل مەرسوومی ئەم ڕێکارانە پێویستن بۆ چارەسەری گرفتەکە.