فەرماندەی هێزەکەی حەشدی شەعبی لەبارەی چوونیان بۆ کوڵەجۆ قسە بۆ ئاڤا دەکات

ئاڤا نیوز 

بەڕێوەبەری ناحیەی قەرەتەپە لەبارەی ئامانجی چوونی هێزەکەی حەشدی شەعبی بۆ کوڵەجۆ دەڵێت بۆ پاراستنی بیرە نەوتەکان بووە، بەڵام فەرماندەی هێزەکەی حەشدی شەعبی کە چووەتە ناوچەکە شتێکی دیکە دەڵێت.

چیرۆکی سەرەکی: سەرلەبەیانی ئەمڕۆ هێزێکی حەشدی شەعبی بە چەکی قورسەوە  بەرەو ناحیەی کوڵەجۆ جووڵەیان کرد و دەستیان بەسەر کێڵگەیەکی نەوتدا گرت،  ڕووداوەکە کاردانەوەی فراوانی لێکەوتەوە و داواکرا دەستبەجێ ئەو هێزەی حەشدی شەعبی پاشەکشە بکات.

لێدوانی فەرمی: وەسفی عەلوان، بەڕێوەبەری ناحیەی قەرەتەپە کە عەرەبە، بە ئاڤا نیوزی گوت: "چەند بیرێکی نەوتی لە ناوچەکە هەن و لەم دواییانە مۆڵەتی کارکردنیان بۆ دەرچووە. لە دەوروبەری ناحیەی قەرەتەپە و جەبارە چەند بیرێکی دیکەی نەوت دۆزراونەتەوە، دەوڵەت لە هەوڵی کارپێخستنی ئەو بیرە نەوتانەیە لەلایەن کۆمپانیای ئیماراتی و تورکی، پاراستنی ئەو بیرە نەوتانەش خراوەتە ئەستۆی لیواکانی حەشدی شەعبی".

زانیاریی زیاتر: بە گوتەی وەسفی عەلوان، ئەو هێزەی حەشدی شەعبی بۆ پاراستنی ئەمنیەتی کێڵگە نەوتەکە چووە کە ناوی قەمەرە و ویستوویانە ڕادەستی کۆمپانیای بکەن بۆ ئەوەی کاری تێدا بکات، هیچ کێشەیەکیش ڕووینەداوە.

لەلایەکی دیکە: تاڵب موسەوی، فەرماندەی حەشدی شەعبی لە دیالە بە ئاڤا نیوزی ڕاگەیاند: "ئێمە تەنیا بۆ بەجێهێنانی ئەرکێکی ئەمنیی کە بەدواداچوون بووە بۆ شانە نووستووەکانی داعش چووینەتە ئەو ناوچەیە، مافی خۆشمانە بۆ هەر شوێنێک بچین بۆ ڕاوەدونانی شانە نووستتووەکانی داعش".

لەلایەکی دیکە: فەرماندەکەی حەشدی شەعبی دەڵێت ئەرکی ئەوان بەدوداچوون و ڕاوەدونانی داعشە نەک پاراستنی بیرە نەوتەکان، "بەڵام ئەگەر فەرماندەی گشتیی هێزە چەکدارەکان [سوودانی] داومان لێ بکات بەو کارە هەڵبستین، لە تواناماندا هەیە پارێزگاری لەو بیرە نەوتانە و ناوچەکەش بکەین".