تۆن کۆین بەهۆی دەستگیرکردنی پاڤێڵ بە ڕێژەی 20% دابەزی

ئاڤا نیوز 

 

دراوی ئەلیکترۆنی تۆن کۆین کە بە تۆڕی کۆمەڵایەتی تێلێگرام بەستراوەتەوە، دوای دەستگیرکردنی خاوەنی تێلێگرام 20%ـی بەهاکەی لەدەست دا. 

 

ئەوەی ئێستا ڕوودەدات: دوای دەستبەرسەرکردنی پاڤێڵ دۆرۆف لە فەرەنسا، دراوی ئەلیکترۆنی تۆن کۆین بەڕێژەی 20% دابەزی و داهاتووی دراوەکە بە نادیاری ماوەتەوە، بەگوێرەی داتاکانی کۆین مارکێت کاپ دراوی ئەلیکترۆنی تۆن کۆین لە مامەڵەکانی ئەمڕۆیدا لە 6.80 دۆلارەوە بۆ  5.35 دۆلار دابەزی.

 

وێنە گەورەکە: تۆن کۆین سەکۆیەکی بلۆکچەینە، لە 2018ـەوە لەلایەن تەلەگرامەوە پەرەی پێدراوە، ئامانج لێی دابینکردنی مامەڵە خێراکانە لە نێوان بەکاربەران و گواستنەوەی پارەیە بە شێوەیەکی ناناوەندی. بۆیە پەیوەندی راستەوخۆ لە نێوان ئەو دراوە و تۆڕی کۆمەڵایەتی تەلەگرام هەیە.

 

هۆکارە زانراوەکان: داکەوتنی ئەو دراوە ئەلیکترۆنییە دوای دەستبەسەرکردنی پاڤێل دۆرۆف دامەزرێنەری تێلێگرام دێت، چونکە کەشێكی تەماوی بۆ وەبەرهێنەران دروستکردووە و نازانن ئایندەی ئەو دراوە لە داهاتوودا چۆن دەبێت. 

 

ئەوەی پێویستە بیزانیت: درەنگانی شەوی ڕابردوو پاڤێل دۆرۆف دامەزرێنەری تێلێگرام لە فڕۆکەخانەی پاریس دەستبەسەرکرا.، دۆرۆف تەمەنی 39 ساڵە و بە فڕۆکە تایبەتەکە لە فڕۆکەخانەیەکی پاریس نیشتەوە.