سێ ڕۆژە ئاگری کەشتییە نەوتییەکەی یۆنان خامۆش نەبووە

ئاڤا نیوز

دوای سێ ڕۆژ هێشتا ئاگری کەشتییە نەوتییەکەی یۆنان نەکوژاوەتەوە و بەردەوامە لە سووتان.

چیرۆکی سەرەکی: ڕۆژی 23ـی ئەم مانگە حوسییەکانی یەمەن هێرشیان کردە سەر کەشتییەکی نەوتهەڵگری یۆنانی، بەهۆیەوە کەشتییەکە ئاگریگرت، ماوەی سێ ڕۆژیشە خامۆش نەبووە. 

ڕاگەیەندراوی فەرمی: فەرماندەیی یەکێتیی ئەوروپا لە دەریای سوور (ئێسپیدس)، لە پۆستێکدا لە تۆڕی کۆمەڵایەتی ئێکس بڵاوی کردووەتەوە، هیچ ئاماژەیەکی ڕوون نییە بە دزەکردنی نەوت بە نێو دەریادا. هەندێک دیمەنی ڕۆژی 25ـی ئەم مانگەیشی داناوە و دەردەکەوێت تاوەکو ئێستا سووتانی کەشتییەکە بەردەوامە و خامۆش نەبووە.

وێنە گەورەکە: ئێسپیدس لە یەکەم ڕۆژی ڕووداوکەوە هۆشداری کارەساتی ژینگەیی لە دەریای سوور دەدات، کە بەدووری 77 میل لە ڕۆژئاوای حودەیدە هێرشی کرایە سەر، بەهۆیەوە کەشتییەکە لەکارکەوت، بەڵام تیمەکەی کە 25 کەس بوون ڕزگارکران.