مالیکی بە مەرج پشتیوانی خۆی بۆ لێبووردنی گشتی ڕادەگەیێنێت

ئاڤا نیوز

 

سەرۆکی هاوپەیمانی دەوڵەتی یاسا پاڵپشتی خۆی بۆ یاسای لێبووردنی گشتی بە مەرج ڕادەگەیێنێت، بە پێویستی دەزانێت لێبووردنەکە تەنیا بۆ تاوانە ئاساییەكان بێت.

 

وێنە گەورەکە: بەهۆی ناکۆکی ئەندامانی پەرلەمان لە هەردوو پێکهاتەی سوننە و شیعە لەسەر پێناسە و تۆمەتی تیرۆر لەناو پرۆژە یاسای هەمواری دووەمی یاسای لێبوردنی گشتی، تاوەکو ئێستا نەتوانراوە خوێندنەوەی دووەم بۆ ئەو پرۆژە یاسایە تەواو بکرێت.

 

لێدوانی فەرمی: نووری مالیکی، سەرۆکی هاوپەیمانی دەوڵەتی یاسا لە پەیامێکی تەلەڤزیۆنیدا ڕایگەیاند:"پشتیوانی لە یاسای لێبوردنی گشتی دەكەین، بەڵام ڕەتیدەكەینەوە ئەو تیرۆریستانە ئازاد بكرێن، كە دەستیان بە خوێنی خەڵكی بێ تاوان سوورە، هاوکات ئەوانەی تاوانبارن بە تاوانەكانی گەندەڵی دارایی و ئیداری و سیخوڕی لە یاسای لێبووردنی گشتی بەدەر بكرێن".

 

زانیاریی زیاتر: بە گوتەی مالیکی، بەرژەوەندی نیشتمانی وا دەخوازێت دەستبەرداری ئەو كەسانە نەبن، كە كوشتن و تیرۆریان ئەنجامداوە و وڵاتیان شێواندووە و ڕێگرییان لە ئاوەدانكردنەوە و خزمەتگوزارییەكان كردووە، بۆیە هیوادارم لێبووردنی گشتی تەنیا بۆ تاوانە ئاساییەكان بێت.