موبادەرەی نیشتمانی: هیچ وادەیەک بۆ هەڵبژاردنی سەرۆکی پەرلەمان  دیاری نەکراوە

ئاڤا نیوز

 

ئەندامێکی فراکسیۆنی موبادەرەی نیشتمانی ئاشکرای دەکات، هیچ ڕێککەوتنێکی سیاسی لەنێوان فراکسیۆنە سوننەکاندا نییە لەسەر بەربژێرێکی دیاریکراو بۆ جێگرتنەوەی محەمەد حەلبوسی وەک سەرۆکی پەرلەمان.

 

وێنە گەورەکە: دوای نۆ مانگ لە دوورخستنەوەی محەممەد حەلبووسی لە سەرۆکی پەرلەمان بە بڕیارێکی دادگەی فیدراڵیی، بەهۆی ناکۆکی نێوان هێزە سیاسییەکانی عێراق لەسەر بەربژێرێک بۆ ئەو پۆستە، تاوەکو ئێستا نەگەیشتوونە ڕێککەوتن.

 

لێدوانی فەرمی: فەهد ڕاشد، ئەندامی فراکسیۆنی موبادەرەی نیشتمانی ڕایگەیاند: سەرەڕای ڕێکنەکەوتنی فراکسیۆنە سوننییەکان، تاوەکو ئێستا ڕێکەوتێک یان وادەیەک بۆ گرێدانی دانیشتنێک بۆ هەڵبژاردنی سەرۆکی پەرلەمان دیاری نەکراوە.

 

زانیاریی زیاتر: ئەو ئەندامەی موبادەرە دانی نا بەبوونی کێشەیەکی سیاسی و بۆچوونی جیاواز سەبارەت بە هەموارکردنەوەی پەیڕەوی ناوخۆی پەرلەمان، ئاماژە بۆ ئەوەش دەکات، هەندێک بە ئاراستەی لێدان لە بڕیارەکانی دادگەی فیدراڵی هەنگاو دەنێن و هەندێکی دیکەش پێیانوایە دادگە پەیوەندی بە هەموارکردنەوەی پەیڕەوی ناوخۆوە نییە.

 

لەلایەکی دیکەوە: مەحموود مەشهەدانی، بەربژێری پۆستی سەرۆکایەتیی پەرلەمان ڕایگەیاند: زۆربەی هێزە سیاسییەکانی عێراق ڕەزامەندییان دەربڕیوە لەسەر بەربژێرکردنی بۆ پۆستی سەرۆکایەتیی پەرلەمان.