هەوڵ دەدرێت مووچەی مانگی نۆی خانەنشینان بە  هاوتاکراوی دابەش بکرێت

ئاڤا نیوز 

 

سەرچاوەیەک لە وەزارەتی دارایی و ئابووری ڕایدەگەیێنێ، مووچەی مانگەکانی حەوت و هەشتی خانەنشینان وەکو ڕابردوو دەبێت و لە هەوڵدان مووچەی مانگی نۆ بەهاوتاکراوی دابەش بکات. 

 

وێنە گەورەکە: لە مانگی شەشەوە لیستی مووچەی خانەنشینان بەهاوتاکراوی بۆ بەغدا نێردراوە و  لیژنەیەک بۆ  وردبینیکردن لە لیستەکە پێکهێنراوە، بەڵام بەردەوامن لە پڕۆسەکە و کارەکانیان تەواو نەبووە، حکومەتی عێراقیش کردوویەتییە مەرج دەبێت سەرجەمیان بایۆمەتری بکەن و هەفتەیەکە پرۆسەکە دەستیپێکردووە.

 

لێدوانی فەرمی: سەرچاوەیەک لە وەزارەتی دارایی و ئابووری بە ئاڤا نیوزی گوت، "ئەو ماوە یاساییەی بۆ تەواوکردنی ڕێکارەکان دانراوە لەبەردەممان ماوە، دەبێت سەرجەم خانەنشینان لە ماوەی هەفتەیەکدا بایۆمەترییان تەواو بێت و وردبینیش لە لیستەکان بەردەوامە، بۆیە مووچەی مانگەکانی حەوت و هەشت کە تائێستا دابەش نەکراوە وەک مانگەکانی پێشوو دەبێت، هەوڵ بۆ ئەوەیە مووچەی مانگی نۆ بە هاوتاکراوی دابەش بکرێت."

 

ئەوەی پێویستە بیزانیت: لە هەرێمی کوردستان نزیکەی 230 هەزار خانەنشین هەیە، بڕی زیادبوونی مووچەیان لە 50 هەزارەوە بۆ 280 هەزار دینار دەبێت و ساڵی خزمەت و بڕوانامەش هەژمار دەکرێت، هاوتاکردنی مووچەشیان لەگەڵ  خانەنشینانی عێراق مانگانە پێویستی بە زیاتر لە 54 ملیار دینارە.