سەرۆکوەزیرانی عێراق لەگەڵ لایەنە ناڕازییەکانی کەرکووک کۆدەبیتەوە

ئاڤا نیوز

 

بۆ چارەسەرکردنی کێشەکانی کەرکووک، سەرۆکوەزیرانی عێراق لەگەڵ نوێنەرانی هەریەک لە پارتی دیموکراتی کوردستان، تورکمانەکان و هاوپەیمانی سیادە کۆدەبێتەوە.

وێنە گەورەکە: پێکهێنانی حکومەتی خۆجێی کەرکووک لە هۆتێل ڕەشیدی بەغدا لە 10ـی ئابی ئەمساڵ بەبێ ئامادەبوونی پارتی و تورکمان و بەشێکی هاوپەیمانیی عەرەبی، کاردانەوەی ئەو لایەنانەی لێکەوتەوە، بە جۆرێک تاوەکو ئێستا ئامادە نین بەشداری لە دانیشتنەکانی ئەنجوومەنی پارێزگاکە بکەن.

زانیاریی بەدەستهاتوو: سەرچاوەیەکی ئاگادار بە میدیای عێراقی ڕاگەیاند: کۆبوونەوەکە لە دیوانی سەرۆکایەتی ئەنجوومەنی وەزیران لە بەغدا ئەنجامدراوە، هەر یەک لە شاخەوان عەبدوڵڵا، جێگری سەرۆکی ئەنجوومەنی نوێنەران، بە نوێنەرایەتی پارتی دیموکراتی کوردستان، حەسەن توران، سەرۆکی بەرەی تورکمانی عێراق و خالید مەفرەجی، گوتەبێژی فەرمی هاوپەیمانی سیادە و ئەندامی ئەنجوومەنی پارێزگای کەرکوک و ڕاکان سەعید، پارێزگاری پێشووی کەرکووک بەشداربوونە.

زانیاریی زیاتر: بە گوتەی ئەو سەرچاوەیە، لە کۆبوونەوەکەدا باس لە کۆمەڵێک بابەتی پەیوەست بە کەرکووک کراوە، لەوانە پێکهێنانی حکومەتی خۆجێی و بەشدارینەکردنی فراکسیۆنە سیاسییەکان لەم حکومەتەدا، وەک پارتی دیموکراتی کوردستان و بەرەی تورکمانی و هاوپەیمانی سیادە. بەبێ ئەوەی وردەکاریی زیاتر بخاتەڕوو.