پێشبینی دەکرێت یاسای باری کەسێتی بۆ کاتێکی نادیار دوابخرێت

ئاڤا نیوز

پەرلەمانتارێکی هاوپەیمانیی دەوڵەتی یاسا پێشبینی دەکات پرسی هەموارکردنەوەی یاسای باری کەسێتی لە عێراق بۆ کاتێکی نادیار دوابکەوێت، ئاماژە بە هەبوونی دەستوەردانی دەرەکیش لەسەر ئەو بابەتە دەکات.

وێنە گەورەکە: ماوەیەکە بابەتی هەمواری یاسای باری کەسێتی ژمارە 188ـی ساڵی 1959 لە عێراق بووەتە جێی مشتومڕ و ناکۆکیی زۆری هاووڵاتیان، دەستەبژێر، ڕێکخراوەکان و بەشێک لە هێزە سیاسییەکان و، وەک هەوڵێک بۆ بەشوودانی کچان لە تەمەنێکی کەمەوە ناوی دەبەن.

لێدوانی فەرمی: سائیر جبووری، پەرلەمانتاری هاوپەیمانیی دەوڵەتی یاسا بە میدیای عێراقی ڕاگەیاندووە: "خوێندنەوەیەکی خراپ بۆ یاساکە دەکرێت لەلایەن چەندین لایەن و مەزهەب و توێژەکانەوە، پێیانوایە یاساکە پێشێلکردنی مافەکانی مرۆڤ و منداڵ و ژنە بەتایبەتی، بۆیە نایانەوێت پەسند بکرێت".

زانیاریی زیاتر: جبووری بەدووری دەزانێت لە ڕۆژانی داهاتوودا ئەو پرۆژەیاسایە پەسند بکرێت و دەڵێت: "لەبەر ئەو هۆکارانەی ئاماژەم پێدان ئەمریکا لەڕێگەی هەندێک وڵاتەوە دەستوەردان دەکات، بۆیە پێشبینی دەکەین ئەو بابەتە بۆ کاتێکی نادیار دوابخرێت".