لەبارەی مووچەی توێژێک وەزیرێکی عێراق سەردانی هەولێر دەکات

ئاڤا نیوز 

 

وەزیری کاری عێراق سەردانی هەرێمی کوردستان دەکات و هەڵوەستە لەسەر هاوتاكردنی مووچەی خاوەن پێداویستییە تایبەتەكانی هەرێمی کوردستان بە عێراق دەکرێت.

 

وێنە گەورەکە: كەیسی مووچەی 102 هەزار خاوەن پێداویستی تایبەت لەلایەن وەزارەتی کار و کاروباری کۆمەڵایەتیی هەرێمی کوردستان ئامادەکراوە بۆ ئەوەی هاوتای مووچەی خاوەن پێداویستییە تایبەتەکانی عێراق بکرێت، بڕیاربوو کوێستان محەممەد؛ وەزیری کار و کاروباری کۆمەڵایەتی لەگەڵ سوودانی، سەرۆکوەزیرانی عێراق کۆببێتەوە و پرسەکە یەکلایی ببێتەوە، بەڵام بەهۆی سەردانی سوودانی بۆ تونس دواخرا.

 

لێدوانی فەرمی: ئاریان ئەحمەد، گوتەبێژی وەزارەتی کار و کاروباری کۆمەڵایەتی بە ئاڤا نیوزی گوت، "ئەحمەد ئەسەدی، وەزیری کاری عێراق سەردانی هەرێمی کوردستان دەکات، لە چوارچێوەی سەردانەکەی لەگەڵ وەزیری کار و کاروباری کۆمەڵایەتی کۆدەبێتەوە و پرسی سەرەکی هاوتاکردنی پرسی خاوەن پێداویستییە تایبەتەكان دەبێت".

 

ئەوەی پێویستە بیزانیت: لە هەرێمی كوردستان 89 هەزار خاوەن پێداویستیی تایبەت مووچە وەردەگرن، لە ساڵی  2014 ـەشەوە 13 هەزار و 120 خاوەن پێداویستی تایبەت لیژنەیان كردووە و چاوەڕوانن مووچەیان بۆ ببڕێتەوە.

 

خاڵە ئەرێنییەکان: 100 هەزار دینار جیاوازی لە نێوان مووچەی خاوەن پێداویستییە تایبەتەكانی هەرێمی كوردستان و عێراق هەیە،  بە هاوتاكردنی مووچەكانیان، كەمترین مووچەی خاوەن پێداویستییە تایبەتەكان دەبێتە 250 هەزار دینار، كە ئێستا 100 بۆ 150 هەزارە.