"هەرێمی كوردستان تێبینییەكانی بەغدای لە لیستی مووچەی مانگی هەشت جێبەجێكردووە"

ئاڤا نیوز 

ئەمڕۆ وەزارەتی دارایی و ئابووری هەرێمی کوردستان لیستی مووچەی مانگی حەوتی ڕاگەیاند، بەگوتەی سەرچاوەیەک لە وەزارەتی دارایی و ئابووری هەرێمی کوردستان، ئەو تێبینییانەی بەغدا هەیەتی لە لیستی مانگی هەشت جێبەجێکراون.

زانیاریی بەدەستهاتوو: سەرچاوەیەک لە وەزارەتی دارایی و ئابووری هەرێمی کوردستان بە ئاڤا نیوزی گوت: "ئەو پارەیەی کە بەغدا بۆ مانگەکانی حەوت و هەشتی ناردووە، ئێمە بۆ مووچەی مانگی حەوت دابەشی دەکەین".

زانیاریی زیاتر: "بڕی ئەو پارەیە یەک تریلیۆن و نزیکەی 100  ملیار دینارە،  ئێستا تێبینیەکانی بەغدا لەسەر لیستی مووچەی مانگی هەشت جێبەجێ دەکەین، دوای تەواوبوونی بۆ بەغدای دەنێرین، دوای ئەوەش لیستی مووچەی مانگی نۆ ئامادە دەکەین و بۆ بەغدای دەنێرین".

لە لایەکی دیکەوە: بەگوتەی سەرچاوەکەی وەزارەتی دارایی"تا ئێستا 90% تێبینییەکانی بەغدا لە بابەتی بایۆمەتری و ناوی هاوشێوە چارەسەر کراون، ئەوانەی ناویان هاوشێوەیە، لە لیستەکەدا بەناوی دایکیانەوە بۆ بەغدا ڕەوانە دەکرێن".

لە گۆشەیەکی دیکەوە: سبەی سێشەممە وەزارەتی دارایی لەگەڵ وەزارەتەکانی کاروباری کۆمەڵایەتی و بازرگانی و پێشمەرگە کۆدەبێتەوە، بۆ ئەوەی ئەو گرفتانەی لە بایۆمەتری و ناوی دووبارە کە لە لیستەکانیان هەیە، چارەسەر بکرێت.