367 ملیار دینار بۆ بودجەی حەشدی شەعبی زیاد دەکرێت

ئاڤا نیوز

 

ئەنجوومەنی وەزیرانی عێراق بڕیاریدا بڕی 367 ملیار دینار بۆ سەر بودجەی حەشدی شەعبی زیاد بکات، تاوەکو دڵنیابێت لە دابینکردنی مووچەی ئەندامانی هێزەکە.

 

وێنە گەورەکە: مووچەی ئەندامانی حەشدی شەعبی بۆ مانگی ئاب زیاتر لە 10 ڕۆژە دواکەوتووە، ئەمەش بەهۆی کەمی بودجەی حەشد بووە لەو مانگەدا.

 

ڕاگەیێنراوی فەرمی: نووسینگەی سەرۆکوەزیرانی عێراق ڕایگەیاند: ئەنجوومەنی وەزیران دەنگ لەسەر زیادکردنی تەرخانکراوەکانی دەستەی حەشدی شەعبی بۆ ساڵی 2024 دەدات بۆ گەرەنتیکردنی مووچە و تەرخانکراوە داراییەکانی ئەندامانی حەشدی شەعبی.

 

لەلایەکی دیکە: پەرلەمانتار مستەفا سەنەد ڕایگەیاند: "ئەنجوومەنی وەزیران دەنگی دا بە زیادکردنی 367 ملیار دینار بۆ پڕکردنەوەی کەمی مووچەی حەشدی شەعبی".

 

ئەوەی پێویستە بیزانیت: بەهۆی دواکەوتنی مووچەی چەکدارانی حەشدی  شەعبی و بڵاوبوونەوەی بڕینی  مووچەکەیان لەلایەن حکومەتی عێراق، سەرکردەیەکی گرووپەکە هەڕەشەی ئەوەی کردبوو دەست بۆ مووچەی حەشدی شەعبی ببەن و بیبڕن، "دەوڵەتی عێراق ڕادەگرم".