لە 10 مانگدا 318 هەزار بارهەڵگر لە ئێرانەوە ڕەوانەی عێراق كراون

ئاڤا نیوز

بەڕێوەبەری گشتی گومرگی پارێزگای کرماشان لە رۆژهەڵاتی کوردستان دەڵێت، لەماوەی 10 مانگی رابردوودا نزیکەی 318 هەزار بارهەڵگری پڕ لەکاڵاو شتوومەک، لە دەروازەی سنوورییەکانی پارێزگاکەوە دەربازی عێراق بوون و بەهاکەی زیاتر لە دوو ملیار و نیو دۆلار بووە.

لێدوانی فەرمی: عەلی ئەسغەر عەباس، بەڕێوبەری گومرگی پارێزگای کرماشان بە ئاژانسی میهری ئێرانی  راگەیاند: زۆرترین بارهەڵگر لە دەروازەی پەروێزخانەوە دەربازی عێراق بوون کە 119 هەزارو39 بارهەڵگربوون. دەروازەی خوسرەویش 79 هەزارو542 بارهەڵگر، سۆمار 61 هەزارو 237 بارهەڵگر، شێخ ساڵح 35 هەزارو 285 بارهەڵگر، شۆشمێش 22 هەزارو 795 بارهەڵگر.  

" هەموو ئەو بارهەڵگرانە بڕی شەش ملیۆن و75 هەزارو 865 تۆن کاڵایان لە ئێرانەوە گواستووەتەوە بۆ عێراق، بەبەهای دوو ملیارو587 ملیۆن دۆلار. زۆرترین کاڵاش کە هەناردە کرابێت، ئاسن، کاشی و سیرامیک، سەوزەو میوە، بەرهەمی شیرەمەنی، پلاستیک بووە".