بەهۆی ناکۆکییەوە هەڵبژاردنی ڕێکخەری بزووتنەوەی گۆڕان دواخرا

ئاڤا نیوز

 

بەهۆی ناکۆکی دوو باڵەکەی بزووتنەوەی گۆڕان (کوڕانی نەوشیروان مستەفا و عومەری سەید عەلی) هەڵبژاردنی ڕێکخەری گشتیی بزووتنەوەکە بۆ کاتێکی نادیار دواخرا.

وێنە گەورەکە: بزووتنەوەی گۆڕان دەیەوێت پێش هەڵبژاردنی پەرلەمانی کوردستان کە بڕیارە 20-10ی ئەمساڵ بکرێت، ڕێکخەری گشتی و خانەکان هەڵبژێرت، دواتر دەست بە چاکسازی نێوخۆیی بکات بە ئامانجی هەڵسانەوە و دەستپێکردنی قۆناغێکی نوێ.

زانیاریی بەدەستهاتوو: سەرچاوەیەکی ئاگادار لەنێو بزووتنەوەی گۆڕان بە ئاڤا نیوزی ڕاگەیاند، بڕیاربوو ئەمڕۆ هەڵبژاردنی جڤاتی گشتیی بزووتنەوەی گۆڕان بکرێت و ڕێکخەری گشتیی هەڵبژێردرێت، بەڵام بەهۆی ناکۆکی لە نێوان هەردوو باڵاکە دانیشتنەکە دواخرا.

زانیاریی زیاتر: بەپێی قسەی ئەو سەرچاوەیە، "باڵی عومەری سەید عەلی کە ئێستا خۆی ڕێکخەرە، ڕێگربوون لەوەی هەڵبژاردنەکە بکرێت کە ئێستا کەمینەن لەنێو گۆڕان و قورخکارییان کردووە، باڵی بەرامبەریش کە  کوڕانی نەوشیروان مستەفان ڕێگە بەم قورخکارییە نادەن و هەفتەی ئایندە ئەم بابەتە یەکلا دەکەنەوە".

ئەوەی پێویستە بیزانیت: دانا ئەحمەد مەجید، پارێزگاری پێشووتری سلێمانی کە دۆستێکی نزیکی نەوشیروان مستەفا بوو، لە دیارترین ئەو کەسانەیە خۆی بۆ پۆستی ڕێکخەری گشتیی بەربژێرکردووە و لە باڵی کوڕانی نەوشیروان مستەفایە.