ڕێکخراوێکی ئەمریکی زانیاریی لەبارەی قوربانییانی بۆردومانەکەی شارباژێر ئاشکرا دەکات

ئاڤا نیوز 

 

ڕێکخراوی CPT ی ئەمریکی لەبارەی بۆردوومانەکەی گوندی هەرمێلەی شارباژێڕ دەڵێت: یەکێک لەو کەسانەی لەناو ئۆتۆمبێلە بەرکەوتووەکەی ئەمرۆ، مێرمنداڵێکبووە و کانۆلا بەدەستیەوە بووە.
 

چیرۆکە سەرەکیەکە: لە هەمان کاتی بۆردوومانەکەی دوێنێ لەڕێگەی درۆنەوە، ئەمڕۆش لە گوندی هەرمێلەی ناحیەی زەلان لە سنووری قەزای شارباژێڕ ئۆتۆمبێلێکی جۆری پیکاب بۆردوومان کرا و سێ کەس گیانیان لەدەستدا. 

 

لێدوانی فەرمی: لەبارەی ڕووداوی بۆردوومانەکەی نیوەڕۆی ئەمڕۆ کامەران عوسمان، ئەندامی تیمی کوردستانی عێراقی ڕێکخراوی 'CPT' ی ئەمریکی بە ئاڤا نیوزی ڕاگەیاند: کاتژمێر 1:40 ی دوای نیوەڕۆ لەڕێگەی درۆنەوە ئۆتۆمبێلێک بەئامانج گیراوە، سێ کەس بەرکەوتوون، یەکێکیان خەڵکی گوندی چەمەکەی ناحیەی زەلانە و ئەوەی دیکەیان مێرمنداڵێکە کانۆلا بەدەستیەوە بووە، ئەوەی سێیەم بەهۆی زۆری ڕێژەی سووتانەکەی ناسنامەکەی ئاشکرا نەبووە.

 

زانیاری زیاتر: کامەران عوسمان ئەوەش دەڵێت: هێشتا ناتوانرێت لەبارەی ناسنامەی ئەو کەسانەی ئەمڕۆ بەرکەوتوون هیچ بڕیارێک بدرێت، بەڵام ئەمساڵ تورکیا لەڕێگەی بۆردوومانی فڕۆکە و درۆن 15 هاونیشتمانی کردووەتە قوربانی لەو ژمارەیە 13 کەسیان گیانیان لەدەستداوە و دووانیان بریندار بوون.