گوژمەیەکی دیکەی پارە لەلایەن بەغدا دەخرێتە سەر هەژماری بانکی هەرێمی کوردستان

ئاڤا نیوز


سەرەتای هەفتەی داهاتوو گوژمەی یەکەمی پارەی گەنمی جووتیاران دەخرێتە سەر هەژماری بانکی هەرێمی کوردستان و بە دوو قۆناغ پارەکە دەنێردرێت.

 

وێنە گەورەکە: زیاتر لە 40 ڕۆژە پڕۆسەی وەرگرتنی گەنم لە سایلۆکانی هەرێمی کوردستان تەواو بووە، تەنیا 74 ملیار دینار کە دەکاتە 12.5% ـی پارەکەی لەلایەن وەزارتی دارایی عێراق خەرج کراوە، دوێنی شاخەوان عەبدوڵڵا جێگری سەرۆکی پەرلەمانی عێراق ڕایگەیاند، سوودانی بڕیاری خەرجکردنی داوە و 200 ملیار دیناری دیکە خەرج دەکرێت.

لێدوانی فەرمی: زۆزان کۆچەر، ئەندامی لیژنەی کشتوکاڵ لە پەرلەمانی عێراق بە ئاڤا نیوزی گوت، "ڕۆژی یەکشەممە 08-09-2024 گۆژمەی یەکەمی پارەی گەنمی جووتیاران کە 150 ملیار دینارە دەخرێتە سەر هەژماری بانکیی هەرێمی کوردستان."

زانیاریی زیاتر: تاوەکو کۆتایی ئەم مانگە گوژمەی دووەمی پارەکە دەگات، کە ئەویش 150 ملیار دینارە، کۆی گشتیی بەغدا 300 ملیار لەکۆی ئەو 590 ملیار دیناری پارەی گەنمی جووتیارانی هەرێمی کوردستان دەنێرێت.

ئەمە لەکاتێکدایە: ڕۆژی یەکشەممە 01-09-2024 نزیکەی 100 جووتیاری هەرێمی کوردستان چوونە بەغدا و لەگەڵ ئەسیر داود، وەزیری بازرگانیی عێراق و شاخەوان عەبدوڵڵا؛ جێگری سەرۆکی پەرلەمانی عێراق کۆبوونەوە و داوایان کرد پارەکەیان بۆ خەرج بکرێت.