خراپ بەکارهێنانی زیرەکی دەستکرد 10 تریلیۆن دۆلار زیان بە جیهان دەگەیێنێت

ئاڤا نیوز 

شارەزایانی بواری ئاسایشی ئەلیکترۆنی هۆشداری دەدەن، بەهۆی خراپ بەکارهێنانی  زیرەکی دەستکردەوە لە ساڵی 2025دا جیهان 10 تریلیۆن دۆلار زیان دەکات، لەکاتێکدا ساڵی 2015 ڕێژەکە  سێ تریلیۆن دۆلار بووە، جەختیش دەکەنەوە لە نێوان ساڵانی 2019 تا 2023 بابەتی دیپ فەیک (ڤیدیۆ و دەنگی ساختە) 550% زیادی کردووە. 

وێنە گەورەکە: ڕۆژانی 4 و 5ی ئەم مانگە لە شاری شاریقەی ئیمارات کۆڕبەندی نێودەوڵەتی تایبەت بە چۆنیەتی سوودوەرگرتن لە زیرەکی دەستکرد لەلایەن حکومەتەوەکان بەڕێوەچوو، تیایدا گفتوگۆ لەبارەی دانانی یاسا بۆ چۆنیەتی بەکارهێنان و بونیادنانی داهاتوویەکی ئەلیکترۆنی پڕ لە ئاسایش و پارێزراو کرا.

لێدوانی فەرمی: هیکتۆر مونسیگۆر، دامەزرێنەری کۆمپانیای تایبەت بە ئاسایشی ئەلیکترۆنی لە کۆڕبەندەکەدا ڕایگەیاند، دیپ فەیک (گۆڕانکاری لە ڤیدیۆ و دەنگ بەجۆرێک کە زۆر نزیکە لەڕاستییەوە) و زیرەکی دەستکرد دوو بەرنامەی نوێ نین، بەڵام بەم دواییانە بۆ هەموو کەسێک بەردەستکراون و دەکرێت سوودی زۆریان لێ وەربگیرێت، بۆیە لە 10 ساڵی ڕابردودا زۆر پێشخراون و بەرنامە بۆ چۆنیەتی بەکارهێنانیان دانراوە.

بۆچی گرنگە: دیپ فەیک و زیرەکی دەستکرد دوو تەکنەلۆژیای نوێ و هەستیارن و سەرەڕای لایەنی ئەرێنییان بۆ خزمەتی مرۆڤایەتی، بەڵام هەندێکجار دەکرێت لە بواری هەڵخەڵەتاندن (بۆ مەبەستی پارە وەرگرتن) و بڵاوکردنەوەی هەواڵی ناڕاست بەکاربهێنرێن، ئەوەش ئاسایشی تاک و بناغە و بەهاکانی کۆمەڵگەکانی خستووەتە مەترسییەوە، بۆیە داوا دەکرێت لەڕێگەی زیاتر گەشەپێدانی زیرەکی دەستکرد و ڕێکخستنیی بە یاسا، حکومەتەکان خزمەتگوزاری باشتر پێشکەش بە هاووڵاتیان بکەن.