شاندی ئەنجوومەنی وەزاریی ئابووریی عێراق گەیشتە هەولێر

ئاڤا نیوز

شاندی ئەنجوومەنی وەزاریی ئابووری عێراق بەسەرۆکایەتیی د.فواد حوسێن گەیشتە هەولێر و لەلایەن ژمارەیەک وەزیر و بەرپرسی حکومەتی هەرێمی کوردستان لە فڕۆکەخانە پێشوازییان لێکرا.

 

وێنە گەورەکە: ڕۆژی یەکشەممە 07-09-2024، کاتژمێر 09:30 خولەک لە هۆڵی سەعد عەبدوڵڵا، بەئامادەبوونی سەرۆکوەزیران بارزانی کۆبوونەوەی هەردوو ئەنجوومەنی وەزاریی عێراق بۆ کاروباری ئابووری و ئەنجوومەنی ئابووریی هەرێمی کوردستان بۆ گفتوگۆکردن لەبارەی چارەسەرکردنی کێشە هەڵپەسێردراوەکانی نێوان هەردوولا دەکرێت، بەتایبەتی مافە دەستوورییەکان و شایستە داراییەکان و بەشە بودجەی هەرێمی کوردستان .

زانیاریی پەیامنێر: کوردستان حەسەن، پەیامنێری دیپلۆماسی ئاڤا لە فڕۆکەخانەی هەولێر گوتی، "شاندەکە لە فواد حوسێن، سەرۆکی ئەنجوومەنی وەزاری عێراق بۆ کاروباری ئابووری، تەیف سامی، وەزیری دارایی، عەلی عەلاق، پارێزگاری بانکی ناوەندیی و ژمارەیەک ڕاوێژکاری سوودانی پێکهاتووە".

زانیاریی زیاتر: پێشتریش هەریەک لە ئەسیر داودی، وەزیری بازرگانی؛ ئەحمەد ئەسەدی، وەزیری کار و کاروباری کۆمەڵایەتی و عەباس مالیکی، وەزیری کشتوکاڵ گەیشتبوونە هەولێر.

ئەوەی پێویستە بیزانیت: لە کۆبووەنەوەی سبەی؛ هەردوولا پێنج تەوەری گرنگ لە نێوان هەولێر و بەغدا تاوتوێ دەکەن، کە پێکهاتوون لە دۆسیەی دەروازەکان، گومرگ، کشتوکاڵ، بازرگانی و بابەتەی دەستەبەری بیمەی کۆمەڵایەتی، هاوکات بەهێزکردنی هەماهەنگی بۆ برەودانی زیاتر بە کەرتی کشتوکاڵ و یەکخستنی ڕێکارەکان بۆ قەدەغەی هاوردەی بەرهەمی دەرەکی بەگوێرەی پێویستی و زیادکردنی پشتیوانی بۆ بەرهەمی ناوخۆ.

 

لەلایەکی دیکەوە: دوای کۆبوونەوەکە تەیف سامی، وەزیری دارایی عێراق و ئاوات شێخ جەناب، وەزیری دارایی و ئابووریی هەرێمی کوردستان کۆبوونەوەیەکی تایبەت لەبارەی پرسی مووچە و چۆنیەتی چارەسەرکردنی گرفتەکان دەکەن.