وەزارەتی دارایی عێراق نیازپاکی بۆ چارەسەرکردنی کێشەی مووچە ڕادەگەیێنێت

ئاڤا نیوز

 

وەزارەتی دارایی عێراق ڕایگەیاند، لە کۆبوونەوەی ئەنجوومەنی ئابووریی عێراق و هەرێمی کوردستان، گفتوگۆ لەبارەی مووچە و شایستە داراییەکانی هەرێمی کوردستان و کێشه هەڵپەسێردراوەکانی نێوان هەولێر و بەغدا دەکرێت.

وێنە گەورەکە: بەسەرۆکایەتیی سەرۆکوەزیران مەسرور بارزانی، هەردوو ئەنجوومەنی وەزاریی عێراق بۆ کاروباری ئابووری و ئەنجوومەنی ئابووریی هەرێمی کوردستان، ڕۆژی یەکشەممە 8-9-2024 لە هەولێر دەست بە زنجیرەیەک کۆبوونەوە دەکەن و دوو ڕۆژ دەخایەنن.

ڕاگەیێنراوی فەرمی: وەزارەتی دارایی عێراق بڵاویکردەوە، لە کۆبوونەوەکاندا لەگەڵ حکومەتی هەرێمی کوردستان، گفتوگۆ لەبارەی مووچە و شایستە داراییەکانی هەرێمی کوردستان دەکرێت، بە ئامانجی چارەسەرکردنی کێشەکانی نێوان هەردوولا بەپێی دەستوور و یاسا بەرکارەکان.

زانیاریی زیاتر: تەوەری گفتوگۆکان بریتیی دەبن لە مافە دەستوورییەکانی هەرێمی کوردستان، مافە داراییەکانی هەرێمی کوردستان بەگوێری لێکتێگەیشتنەکان و کۆی کێشه هەڵپەسێردراوەکانیش تاوتوێ دەکرێن.

بۆچی گرنگە: وەزارەتی دارایی دەڵێت، ئامانجی سەردانەکەی ئەنجوومەنی ئابووریی عێراق بۆ هەرێمی کوردستان بۆ سێ مەبەستە، ئەوانیش؛ بەهێزکردنی هەماهەنگی نێوان بەغدا و هەولێر لە بواری ئابووریی و دارایی، چارەسەری کێشە هەڵپەسێردراوەکان بەگوێرەی دەستوور، بەهێزکردن و گەشەپێدانی پەیوەندییەکانی نێوان هەردوولا بۆ خزمەتی گەلی عێراق.