بڕیاری دەستگیرکردن بۆ کەفیلەکانی نوور زوهێر و هەیسەم جبووری دەرکرا

ئاڤا نیوز

دادگای ناوەندیی بەرەنگاربوونەوەی گەندەڵی لە بەغدا بڕیاری دەستگیرکردنی بۆ کەفیلەکانی نوور زوهێر و هەیسەم جبووری، تۆمەتبارانی دۆسیەی "دزیی سەدە" دەرکرد.

وێنە گەورەکە: دادگای ناوەندیی بەرەنگاربوونەوەی گەندەڵی لە بەغدا ڕۆژی 27-8-2024، فەرمانی دەستگیرکردنی بۆ نوور زوهێر و هەیسەم جبووری دەرکرد. مۆڵەتی دوو هەفتەشی بە کەفیلەکانی دا تاوەکو ڕادەستیان بکەن.

ئەوەی ئێستا ڕوودەدات: ئەمڕۆ دووشەممە ئەو وادەیە کۆتاییهات کە دادگای ناوەندیی بەرەنگاربوونەوەی گەندەڵی لە بەغدا وەک مۆڵەت دابوویە کەفیلەکانی تۆمەتبارانی دۆسیەی "دزیی سەدە" تاوەکو خۆیان ڕادەست بکەن.

چی ڕوویدا: دادگا بڕیاری دەستگیرکردنی بۆ حەوت کەفیل، چوار کەفیلی نوور زوهێر و سێ کەفیلی هەیسەم جبووری دەرکرد. هاوکات ڕۆژی 21-11-2024ی بۆ دانیشتنی دادگاییکردنی نوور زوهێر و هەیسەم جبووری دیاریکرد.

ئەوەی پێویستە بیزانیت: لەسەر دۆسیەی ئاسانكاریكردن بۆ بردنەدەرەوەی بڕی 2.5 ملیار دۆلار لە بانکی ڕافیدەین، وەک یەكێک لە گەورەترین سكانداڵەكانی گەندەڵی دارایی لە عێراق کە بە "دزیی سەدە" ناسراوە، چەندین کەس دراونەتە دادگا و دادگایی کراون.