لەبارەی فرۆشتنی دۆلار بە گەشتیار و بازرگانان بڕیار دەدرێت

ئاڤا نیوز 

 

شاندی بازرگانیی هەرێمی کوردستان لەگەڵ شاندی بازرگانیی عێراق کۆبووەوە، تیشک خرایە سەر پێدانی مۆڵەتی بانکی ناوەندی بە کۆمپانیاکانی دراوی هەرێمی کوردستان، بۆ ئەوەی سوودمەندبن لە خزمەتگوزارییەکان لەنێویدا وەرگرتنی دۆلار بە نرخی  بانکی ناوەندی.

 

وێنە گەورەکە: بانکی ناوەندیی عێراق لەڕێگەی ئەو کۆمپانیایانەی مۆڵەتی فەرمییان هەیە، لە فڕۆکەخانەکان دۆلار بە نرخی فەرمی (100 دۆلار بە 132 هەزار دینار) بە بازرگانان و گەشتیاران دەفرۆشێت و هەر گەشتیارێک دەتوانێت سێ هەزار دۆلار وەربگرێت، بەڵام نزیکەی ساڵێكە پرۆسەکە لە فڕۆکەخانەی هەولێر ڕاگیراوە.

 

لێدوانی فەرمی: بڵند محەممەد، بەڕێوەبەری گشتیی تۆمارکردنی کۆمپانیاکان بە ئاڤا نیوزی گوت: "داوامان کردووە ئاسانکاری بکرێت بۆ کۆمپانیاکانی ئاڵوگۆڕی دراو لە هەرێمی کوردستان، بۆ ئەوەی بتوانن دۆلار بە نرخی فەرمی لە فڕۆکەخانەکانی هەرێمی کوردستان بە گەشتیاران و بازرگانان بدەن، ئەمڕۆ لە کۆبوونەوەی ئەنجوومەنی ئابووری یەکلایی دەکرێتەوە".

 

خاڵە ئەرێنییەکان: حەوت کۆمپانیای ئاڵوگۆڕی دراوی عێراقی مۆڵەتیان بۆ فرۆشتنی دۆلار لە فڕۆکەخانەی هەولێر وەرگرتووە و بڕیارە لەنێو فڕۆکەخانە نووسینگە بکەنەوە، هاوکات 48 کۆمپانیای ناوخۆش ڕێکارەکانی وەرگرتنی مۆڵەتیان تەواو کردووە و تەنیا ڕەزامەندی بانکی ناوەندییان ماوە.

 

لەلایەکی دیکەوە: لە کۆبوونەوەکەدا بڕیاردرا، ئەو کۆمپانیایانەی ناویان بە ئینگلیزی نووسراوە پێویست بە گۆڕینی ناو ناکات، بە هەمان ناو ڕاستەوخۆ بە بەغدا ببەسترێنەوە، گرفتی گۆڕینی ناویان نەمێنێت.