ئەنجامی کۆبوونەوەی هەولێر و بەغدا لەبارەی مووچە

ئاڤا نیوز 

 

ناوەڕۆكی كۆبوونەوەی هاوبەشی دوو ڕۆژی ئەنجوومەنی وەزاریی بۆ ئابووری و ئەنجوومەنی ئابووریی هەرێمی كوردستان ڕاگەیێنرا.

 

وێنە گەورەکە: ڕۆژانی یەکشەممە و دووشەممە، بە سەرپەرشتیی سەرۆکوەزیران بارزانی، ژمارەیەک کۆبوونەوە لەنێوان هەردوو ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان لە شاری هەولێر بەڕێوەچوو.

 

ڕاگەیێنراوی فەرمی: بەپێی ڕاگەیێنراوێكی حكومەتی هەرێمی كوردستان لەمیانەی كۆبوونەوەكاندا هەندێک لە بابەتەكان بڕیاری هەنووکەییان لەبارەوە دراوە و ئەوانی تریش ڕاسپاردە ئاراستەی ئەنجوومەنی وەزیرانی فیدراڵ کراوە و جەخت لە بەردەوامبوونی گفتوگۆکان كراوەتەوە بۆ چارەسەرکردنی ئەو پرسانەی کە پێویستیان بە کۆبوونەوە و دیداری زیاتر هەیە. 

 

زانیاریی زیاتر: ئەنجوومەنی وەزاریی بۆ ئابووری بڕیاریدا بە پێشکەشکردنی ڕاسپاردەیەک بۆ ئەنجومەنی وەزیرانی فیدراڵ بۆ ئاڕاستەکردنی وەزارەتی دارایی تاوەکو چارەسەرێک بۆ ناردنی مووچە ڕاگیراوەکانی هەرێمی كوردستان بدۆزێتەوە.

ئەمەش بزانە: گفتوگۆ لەبارەی هەندێک پرسی پەیوەندیدار بە مۆڵەتی هەناردە و هاوردەکردن، مۆڵەتی کارگەکان، تۆمارکردنی کۆمپانیاکان، پۆلێنکردنی بەڵێندەران، دەروازە سنوورییەکان، گومرگ، دۆسێیەی نەوت و وزە و کەرتی بانکی کراوە.

 

لەلایەكی دیكەوە: ڕاسپاردەیەکی دیکەی ئەنجوومەنی وەزاریی بۆ ئابووری، بەردەوامبوونی کارکردنی لیژنە هاوبەشەکانی نێوان وەزارەت و کەرتە پەیوەندیدارەکانە بۆ تەواوکردنی ئەو ئەرکانەی پێیان سپێردراوە لە پێناو گەیشتن بە ڕێککەوتنێکی هاوبەش کە لە بەرژەوەندی هەموو هاووڵاتییانی عێراقدا بێت.

 

ئەوەی پێویستە بیزانیت: ئەنجوومەنی وەزاریی پێشنیاری ئەنجامدانی کۆبوونەوەیەکی تایبەت و لە ئاستێکی باڵادا دەکات بۆ گفتوگۆکردن لەبارەی دۆسێیەکان نەوت و وزە و دەروازە  سنوورییەکان و گومرگ، هاوكات بانگهێشتی ئەنجوومەنی ئابووریی هەرێمی کوردستان کرا بۆ ئەنجامدانی کۆبوونەوەیەکی هاوبەش لەگەڵ ئەنجوومەنی وەزاریی بۆ ئابووری، لە شاری بەغدا.