ڕاسپاردەیەک بۆ چارەسەرکردنی کێشەی مووچە ڕاگیراوەکانی هەرێمی کوردستان پێشکەش دەکرێت

ئاڤا نیوز 

 

حکومەتی هەرێمی کوردستان بۆ چارەسەرکردن و ناردنی مووچە ڕاگیراوەکان ڕاسپاردەیەک پێشکەش بە ئەنجوومەنی وەزیرانی عێراق دەکات.

 

وێنە گەورەکە: ڕۆژانی یەکشەممە و دووشەممە، بە سەرپەرشتیی سەرۆکوەزیران بارزانی، ژمارەیەک کۆبوونەوە لەنێوان هەردوو ئەنجوومەنی وەزاریی عێراق و هەرێمی کوردستان لە شاری هەولێر بەڕێوەچوو. هەندێک لە بابەتەكان بڕیاری هەنووکەییان لەبارەوە دراوە و ئەوانی دیکەش وەک ڕاسپاردە ئاراستەی ئەنجوومەنی وەزیرانی فیدراڵ کران.

 

ڕاگەیێنراوی فەرمی: حکومەتی هەرێمی کوردستان ڕاگەیاند: ئەنجوومەنی وەزاری بۆ ئابووری بڕیاری دا بە پێشکەشکردنی ڕاسپاردەیەک بۆ ئەنجوومەنی وەزیرانی فیدراڵ بۆ ئاڕاستەکردنی وەزارەتی دارایی فیدراڵ بۆ چارەسەرکردن و ناردنی مووچە ڕاگیراوەکانی هەرێمی کوردستان، ئەوانەی بەهۆی تەواونەکردنی بایۆمەتری دوورخرابوونەوە.

 

لەلایەکی دیکەوە: حکومەتی هەرێمی کوردستان ڕاگەیاند: بانگهێشتی ئەنجوومەنی ئابووریی هەرێمی کوردستان کرا بۆ ئەنجامدانی کۆبوونەوەیەکی هاوبەش لەگەڵ ئەنجوومەنی وەزاری بۆ ئابووری، لە شاری بەغدا.

 

ئەوەی پێویستە بیزانیت: ئەمڕۆ سێشەممە 10-9-2024 ئەنجوومەنی وەزیرانی عێراق کۆدەبێتەوە، پێدەچێت یەکێک لە تەوەرەکانی کۆبوونەوەکە گفتوگۆکردن و بڕیاردان بێت لەسەر ڕاسپاردەکانی کۆبوونەوەی هاوبەشی ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان.