ئەڵمانیا بۆ بەرهەمهێنانی وزەی پاک هاوکاریی عێراق دەکات

ئاڤا نیوز 

باڵیۆزخانەی ئەڵمانیا لە عێراق دەڵێت، وڵاتەکەی ئامادەیی خۆی دەربڕیوە هاوبەشیی و پێکەوەکاردنی لەگەڵ حکومەتی عێراق لەبواری بەرهەمهێنانی وزەی پاکدا زیاتر بکات.

وێنە گەورەکە: بەمەبەستی بونیادنانی تۆڕێکی کارەبای پێشکەوتوو، هەر لە دابینکردنی وزەوە تا گواستنەوە و نوێکردنەوەی هێڵەکانی کارەبا و سوودوەرگرتن لە سەرچاوەکانی دیکەی دۆستی ژینگە بۆ بەرهەمێنانی وزە، ساڵی ڕابردوو عێراق ڕێککەوتنی لەگەڵ کۆمپانیای سیمنزی ئەڵمانی واژۆ کرد.

لێدوانی فەرمی: ڕولاند فیستبە، هەڵسوڕێنەری کاروباری باڵیۆزخانەی ئەڵمانیا لە بەغدا لەمیانی کۆبوونەوەیدا لەگەڵ زیاد عەلی فازڵ، وەزیری کارەبای عێراق ڕایگەیاند، لە کۆبوونەوەکەدا باسیان لە زیاترکردنی هەماهەنگی لەبواری وزەدا کردووە، بەتایبەت سوودوەرگرتن لە توانای هەردوولا بۆ بەرهەمهێنانی وزەی نوێ و پاک کە دۆستی ژینگەن.

لەلایەکی دیکە: وەزارەتی کارەبا بڵاویکردەوە، ئێستا کۆمپانیای سیمنزی ئەڵمانی لە بواری بەرهەمهێنانی غاز و پەرەپێدانی کەرتی کارەبا لە عێراق کاردەکات، هەردوولاش سەرکەوتوو بوون لە بونیادنانی تۆڕێکی کارەبای پێشکەوتوو لە گواستنەوە و بەرهەمهێنانی وزە، بۆ فراوانکردنی ئەو پێکەوەکارکردنەش چاویان لەوەیە بانکەکانی ئەڵمانیا هاوکارییان بن لە پێدانی قەرز بۆ بونیادنانی پڕۆژەی ستراتیژییتر لە بواری وزەدا.