نرخی گۆشتی سوور دادەبەزێت

ئاڤا نیوز

 

بەهۆی هاوردەکردنی ئاژەڵی زیندوو لە وڵاتانی دەوروبەرەوە بۆ ناوەوەی هەرێمی کوردستان، کاریگەری کردووەتە سەر دابەزاندنی نرخی گۆشتی سوور لە بازاڕەکاندا.

 

لێدوانی فەرمی: فیراس سدیق، بەڕێوەبەری سامانی ئاژەڵ لە وەزارەتی کشتوکاڵ بە ئاڤا نیوزی ڕاگەیاند: بە بڕیاری سەرۆکوەزیران مەسرور بارزانی، ڕێژەی 50٪ باجی گومرگی لەسەر هاوردەکردنی ئاژەڵ کەمکراوەتەوە، کە ئەمەش بۆ ئەوە بووە ڕێگری بکرێت لە بەرزبوونەوەی نرخی گۆشتی سوور، ئێستا لە دەروازە سنوورییەکان هیچ ڕێگریەک نیە بۆ هاوردەکردنی ئاژەڵی تەندروست. 

 

لەلایەکی ترەوە: لقمان قەساب، یەکێکە لە گۆشت فرۆشەکانی هەولێر، بە ئاڤا نیوزی ڕاگەیاند: کەمکردنەوەی ڕێژەی باجی گومرگی لەسەر هاوردەکردنی ئاژەڵی زیندوو، کاریگەری لەسەر دابەزینی نرخی گۆشتی سوور هەبووە، بەجۆرێک پێشتر نرخی یەک کێلۆ گۆشتی سووری نەرمە لە نێوان 20 هەزار بۆ 22 هەزار دینار بوو، بەڵام ئێستا نرخەکەی لە نێوان  16 هەزار تا 18 هەزار دینارە. 

 

ئەمەش بزانە:  پێشتر هەر کیلۆیەک ئاژەڵی گەورەی  بە زیندووی هەشت هەزار دینار بوو و  ئاژەڵی بچووکیش نرخی 10 هەزار بوو، بەڵام دوای کەمکردنەوەی باجی گومرگی لەسەر هاوردەکردنی ئاژەڵ، ئێستا نرخی ئاژەڵی گەورە بە زیندویی حەوت هەزار دینارە و ئاژەڵی بچووکیش کیلۆی نۆ هەزارە.