هاککەرە ئێرانییەکان دامەزراوەکانی عێراق هاک دەکەن

ئاڤا نیوز

 

شیکارییەک کە لەلایەن کۆمپانیایەکی تایبەتمەند لە ئاسایشی ئەلیکترۆنی ئەنجامدراوە، دەریخستووە دامودەزگاکانی حکومەتی عێراق و دامەزراوەکانی دیکەی ئەو وڵاتە لەلایەن هاککەرە ئێرانییەکانەوە دەکرێنە ئامانج.

 

چیرۆکی سەرەکی:  کۆمپانیای 'چێک پۆینت' بۆ ئاسایشی ئەلیکترۆنی ئیسرائیل شیکارییەکی لە ماڵپەڕی فەرمی خۆیدا بڵاوکردووەتەوە کە گرووپێکی ئێرانی ناسراو بە APT34 ، هێرشی ئەلیکترۆنی کردووەتە سەر دامودەزگاکانی عێراق.

 

زانیاریی زیاتر: هاککەرە ئێرانییەکان توانیویانە بەشێوەیەک هێرشەکانیان ئەنجام بدەن، بچنە نێو ئەو ئیمەیڵە تایبەتانەی لەنێو ڕێکخراو و دەستەکاندا هەیە، بە فێڵ داوایان لە فەرمانبەران و کارمەندانی ئەو ڕێکخراوانە کردووە زانیاریی کەسیی و تایبەتی خۆیان بنێرن، دواتر لەو ڕێگەیەوە هاککراون و زانیارییەکانیان کەوتۆتە دەستی گرووپە ئێرانییەکە.

 

لەلایەکی دیکەوە: توێژەرانی 'چێک پۆینت' ئاماژەیان بەوە کردووە، “ئەم هەڵمەتە دژی ژێرخانی حکومەتی عێراقە، ئەمەش ئاماژەیە بۆ ئەو هەوڵە بەردەوامانەی هاککەرانی ئێران لە ناوچەکە".

 

ئەوەی پێویستە بیزانیت: ئەو گرووپە بە پلەی یەکەم حکومەت و گرووپ و ڕێکخراوەکانی ڕۆژهەڵاتی ناوەڕاست دەکاتە ئامانج، بە تایبەت لە سعودیە، عێراق، ئیمارات، لوبنان، ئوردن، قەتەر و کوەیت، هاوکات لە ئەلبانیا، ئەمریکا و تورکیا.

 

ئەمەش بزانە: هەواڵەکان ئاماژەیان بەوە کردووە، ئەو گرووپە ئێرانیە لەگەڵ پەرەسەندنی ململانێکانی غەززە، هێرشی ئەلیکترۆنیان کردووەتە سەر ئیسرائیل.

 

باکگراوند: لە هەواڵەکەی چێک پۆینت ئەوەش هاتووە: لە مانگی تشرینی یەکەمی ساڵی ڕابردوو، هاککەرانی سەر بە گرووپەکە، هەشت مانگ دزەیان کردووەتە ناو سیستەمی حکومەتێکی ڕۆژهەڵاتی ناوەڕاست و فایل و ئیمەیڵەکانیان دزیوە. ئەوەی جێگەی سەرنجە چێک پۆینت ئاماژەی بەناوی وڵاتەکە نەکردووە کە هاککەرە ئێرانییەکان دزەیان کردووەتە ناو دامەزراوەکانی.