یاداشتنامەى لێکتێگەیشتنی نێوان عێراق و ئێران بۆچوونی جیاواز دروست دەکات

ئاڤا نیوز

 

لەمیانەی سەردانەکەى سەرۆککۆمارى ئێران  بۆ عێراق 14 یاداشتنامەى لێکتێگەیشتن  لەنێوان هەردوو وڵات لە 11 بوار و سێکتەری جیاجیادا بەسەرپەرشتی محەممەد شیاع سوودانی، سەرککوەزیرانی عێراق و مەسعود پزیشکیان سەرۆککۆماری ئێران واژۆ کرا، لەبارەی ناردنی ناوەڕۆکی ئەو یاداشتنامە واژۆکراوانەی نێوان عێراق و ئێران بۆ  پەرلەمانی عێراق بە ئامانجی پەسەندکردنی، دوو بۆچوونی جیاوازی دروستکردووە. 

 

لێدوانی فەرمی: زەینەب موسەوی، پەرلەمانتاری عێراق بە ئاڤا نیوزی گوت: بەگوێرەی یاسا پێویستە حکومەت ناوەڕۆکی هەموو ڕێکەوتنێکی نێودەوڵەتی ڕەوانەی پەرلەمان بکات و سەرجەم پەرلەمانتاران ئاگارداری ووردەکاریەکانی ببن, بۆیە بەشێکی زۆری ئەو یاداشتنامانەی سوودانی لەگەڵ مەسعود پزیشکیان سەرۆککۆماری ئێران واژۆی کرد، پێویستی بەلایەنی یاسادانان هەیە .

 

لەلایەکی دیکەوە: عەلی تەمیمی، پسپۆڕی یاسایی دەڵێت: "بە گوێرەی بڕگەی دووی یاسای ژمارە 35ـی ساڵی 2015، ئەو یاداشتنامانەی لەنێوان عێراق و ئێران هەروەها ئەو لێکتێگەیشتن و گرێبەستانەی لەگەڵ کۆمپانیا ئێرانییەکان واژۆکراون پێویستیان بە ڕەزامەندی پەرلەمانی عێراق نییە".

 
بابەتە ستراتیژییەکان: یاداشتەکان بریتین لە: ئابووری، هاوکاریی ڕاهێنان، گەنجان و وەرزش، ئاڵوگۆڕی ڕۆشنبیری و هونەریی و شوێنەوار و پەروەردە، هاوکاری میدیایی، پەیوەندییەکان، بەرەوپێشبردنی لایەنی گەشتیاریی ئایینی، هاوکاری لە بواری ناوچە ئازادەکانی عێراق- ئێران، لە بواری کشتوکاڵ و سامانە سروشتییەکان، پۆست، پاراستنی کۆمەڵایەتی، ڕاهێنانی پیشەیی و تەکنیکی، و پەرەپێدانی هێزی کاری لێهاتوو و هاوکاری نێوان ژوورە بازرگانییەکان.