سێ تووشبووی کۆلێرا لە کۆیە تۆمارکران

ئاڤا نیوز

 

سێ تووشبووی کۆلێرا لە کۆیە تۆمارکران، تەندروستیی قەزاکە هۆشداریی بە هاووڵاتیانی سنوورەکە دەدات ڕێکارەکانی خۆپارێزی ڕەچاوبکەن.

 

لێدوانی فەرمی: هاوکار عەلی، بەڕێوەبەری ڕاگەیاندنی تەندروستیی گشتیی کۆیە بە ئاڤا نیوزی ڕاگەیاند: سێ تووشبووی کۆلێرا لە کۆیە تۆمارکراون، یەکێکیان لە قەزای کۆیە، دووانی دیکەش لە ناحیەی تەقتەقن.

 

ئەوەی پێویستە بیزانیت: داوا لە هاووڵاتیانی سنووری قەزاکە دەکرێت ڕێکارەکانی خۆپارێزی بەباشی جێبەجێ بکەن، لەوانە؛ پاکوخاوێنی، دڵنیابوونەوە لە پاکیی سەرچاوەی ئاو، ئاگاداربوون لە خواردنی سەوزە و میوە و باش شۆردنەوەیان پێش خواردنیان، خۆبەدوورگرتن لە خواردنی دەرەوە و سەردانەپۆشراو. لەکاتی هەر سکچوونێکی تووندیشدا سەردانی نەخۆشخانە بکەن.

 

ئەمەش بزانە: بەئامانجی دوورکەوتنەوە لە پەتای سکچوون و ڕشانەوە و نەخۆشییە گوازراوەکان، پاڵپشت بە بڕیاری بەشی خۆپاراستنی تەندروستیی کۆیە، بڕیار دراوە بە قەدەغەکردنی دانانی (هەموو جۆرە سەوزە و ماستاو و شەربەتێک) لە تەواوی خواردنگە و چێشتخانەکان.

 

باکگراوند: لە ماوەی ڕابردوو، لە سلێمانی هەشت تووشبووی پەتای کۆلێرا تۆمارکران، هاوکات لە کەلار و کفری دوو تووشبووی دیکە تۆمارکران.