هاووڵاتییەک بۆ هاوسەرگیری دەچێتە سووریا و دەڕفێنرێت

ئاڤا نیوز

 

هاووڵاتییەکی عێراقی بۆ هاوسەرگیری دەچێتە سووریا، بەڵام لەلایەن باندێکەوە دەڕفێنرێت، تاوەکو هێزە ئەمنییەکان بەهانایەوە دەچن و دەیگەڕێننەوە بۆ عێراق. 

 

چیرۆکی سەرەکی: ئەبو حەسەن حەمید موساعید، هاووڵاتیەکی عێراقییە لە شاری بەسرە بۆ هاوسەرگیریکردن لەگەڵ کچێکی سووری ڕوو لە سووریا دەکات، بەڵام لە ناوچەی بەیازە لە دەوروبەری شاری حومس لە لایەن باندێکەوە دەڕفێنرێت و بۆ سێ هەفتە لەلایەن باندەکە بە دەستبەسەرکراوی دەمێنێتەوە.

 

ڕاگەیێنراوی فەرمی: وەزارەتی دەرەوەی عێراق لە بەیاننامەیەکدا ڕایگەیاند: دوای هەوڵێکی زۆری باڵیۆزخانەی عێراق لە دیمەشق و بەیرووت، بە هاوکاریی دەزگای هەواڵگریی نیشتیمانیی عێراق و بە پەیوەندیی بەردەوام لەگەڵ هێزە ئەمنییەکانی حکومەتی سووریا و لوبنان، توانرا ئەو هاووڵاتییە ڕزگار بکرێت.

 

زانیاریی زیاتر: باندەکە لە بەرامبەر ئازادکردنی ئەبو حەسەن، داوای 500 هەزار دۆلاریان کردبوو، بەڵام باڵیۆزخانەی عێراق و دەزگای هەواڵگریی نیشتیمانی بێ ئەوەی دانوستان لەگەڵ باندەکە بکەن، توانیان هاوڵاتییە عێراقییەکە ڕزگاری بکەن. تۆمەتبارانیش دەستگیر کران و دەدرێنە لایەنی پەیوەندیدار و ڕێکاری یاساییان بەرامبەر دەگیرێتەبەر.