یەکێتی فەرمانگە حکومییەکان بۆ بانگەشەی هەڵبژاردن بەکاردەهێنێت

ئاڤا نیوز 

لە سنووری ئیدارەی گەرمیان یەکێتی دەستی بە بانگەشەی هەڵبژاردن کردووە، بەگوێرەی ڕێنماییەکانی کۆمیسیۆن ئەوەی یەکێتی کردوویەتی دووجار سەرپێچییە، یەکەمیان بەر لە وادەی خۆی دەستیپێکردووە، دووەمیش فەرمانگەی حکومی بەکارهێناوە. 

 

وێنە گەورەكە: بڕیارە 20-10-2024 هەڵبژاردنی پەرلەمانی كوردستان بکرێت، كۆمیسیۆن 16ـی ئەم مانگەی وەک دەستپێكی بانگەشە دیاری كردووە، بەڵام ئەگەری بەهێز هەیە وادەكە بۆ 20 تاوەكو 25ـی ئەم مانگە دوابخرێت.

 

ئەوەی پێویستە بیزانیت: بەگوێرەی ڕێنمایی کۆمیسیۆنی هەڵبژاردنەکانی عێراق، قەدەغەیە بەربژێر و لایەنە سیاسییەکان بارەگا و باڵەخانەی فەرمانگەکانی حکومەت بۆ بانگەشەی هەڵبژاردن بەکاربهێنن، بەڵام نزیکەی مانگێکە فەرمانگە حکومییەکانی کفری وەک ناوەندێک بۆ کۆکردنەوەی جەماوەر لەگەڵ بەربژێرانی یەکێتی بەکاردەهێنرێن.

 

زانیاریی بەدەستهاتوو: ڕۆژی 12-09-2024، د. میران محەممەد، سەرۆکی لیستی یەکێتی لە بازنەی سلێمانی، لە قەزای کفری باڵەخانەی هۆڵی وەرزش و لاوانی کفری بە ئامادەبوونی بەربژێران، بەرپرسی بازنەی یەکێتی لە کفری، دامودەزگا حکومییەکانی شارەکە بۆ بانگەشە بەکاردەهێنرێت ئەمەش پێچەوانەی ڕێککارەکانی کۆمسیۆنی هەڵبژاردنەکان، ڕێنمایەکانی وەزارەتی ناوخۆ و ئیدارەی سەربەخۆی گەرمیان.

 

"ماڵی سپییە بۆ ڕۆژی ڕەش بەکاریدەهێنین"

 

سەرچاوەیەک لە مەکۆی کفری بزووتنەوەی گۆڕان بە ئاڤا نیوزی گوت، "جگە لە باڵەخانەی وەرزش و لاوان، باڵەخانەکانی قایمقامیەت، هێزەکانی ناوخۆ و هۆڵی ڕۆشنبیری بۆ بانگەشە بەکارهێناوە".

 

سەرچاوەکە ئەوەشی گوت: کاتێک ڕەخنەیان لێدەگرین لە وەڵامدا پێمان دەڵێن، "ماڵی سپییە بۆ ڕۆژی ڕەش بەکاریدەهێنین".

 

دیمەنی کۆبوونەوەی د. میران سەرۆکی لیستی یەکێتی لەگەڵ کادیرانی حیزبەکەی لە نێو  باڵەخانەی قایمقامییەت

 

زانیاریی زیاتر: یەکێتیی نیشتمانی کوردستان، ناوی 174 بەربژێری لەهەر چوار بازنەی هەڵبژاردنی پەرلەمانی کوردستان پێشکەشی کۆمیسیۆنی کردووە و ماوەیەکە بە چڕی بانگەشەی هەڵبژاردنی لەسەرجەم بازنەکاندا دەستپێکردووە.

 

ئەوەش بزانە: بەگوێرەی ڕێنماییەکانی کۆمیسیۆن، هەر کەسێک بەر لەوادەی دەستپێکردنی بانگەشە یاخود باڵەخانەی حکومی بۆ بانگەشەی هەڵبژاردن بەکاربهێنێت سزا دەدرێت و ئەگەری دوورخستنەوەشی هەیە لە پرۆسەی هەڵبژاردن.