حکومەتی هەرێمی کوردستان هەلی کاری زیاتر بۆ گەنجان دەرەخسێنێت

ئاڤا نیوز 

دابینکردنی هەلیکار بۆ گەنجان یەکێکە لە پێشینەکانی کاری حکومەتی هەرێمی کوردستان، بۆ ئەمەش سەرۆکوەزیران بارزانی بڕیاریدا 14 پەیمانگای پیشەیی تەکنیکی بکاتەوە بۆ فێرکردن و پێگەیاندنی گەنجی پیشەوەری لێهاتوو لەنێو بازاڕەکانی جیهاندا.

 

بابەتە ستراتیژییەکە: لە کۆنفرانسی تۆڕی هەماهەنگی ڕێکخراوەکان لەگەڵ لایەنی پەیوەندیداری حکومەتی هەرێمی کوردستان، تیشک خرایە سەر ئەوەی چۆن حکومەت بتوانێت دەرفەتی کار بۆ تاکی کورد دروست بکات، لەبەر ئەمە سەرۆکوەزیران بارزانی بڕیاریدا کە لە 75% دەستی کار لە هەرێمی کوردستان ناوخۆیی بێت، لەگەڵ ئەوەشدا لەمەوبەدوا زانکۆ و پەیمانگاکان بتوانن کەسی پیشەوەر و شارەزا بەرهەمبێنن.

 

لێدوانی فەرمی: سیروان گەردی، سەرپەرشتیاری گشتیی تۆڕی هەماهەنگی ڕێکخراوەکان بە ئاڤا نیوزی گوت: وەزارەتی خوێندنی باڵای حکومەتی هەرێمی کوردستان، لەسەر ڕاسپاردەی سەرۆکوەزیران بارزانی بڕیاریدا 14 پەیمانگای پیشەیی تەکنیکی بکاتەوە لەپێناو دروستکردنی دەستی کار لەنێو گەنجانی دەرچوو و نزیککردنەوەیان لە کاری بازاڕ.

 

زانیاریی زیاتر: ئێستا تۆڕی هەماهەنگی ڕێکخراوەکان و حکومەتی هەرێمی کوردستانیش کار لەسەر ئەوە دەکەن کە چۆن بتوانن بەرهەمی زانکۆ و پەیمانگاکان و خواستی بازاڕ لە یەکدی نزیک بکەنەوە.