هاوتاكردنی مووچەی زیندانیانی سیاسی و كەسوكاری شەهیدان بەکوێ گەیشتووە؟

ئاڤا نیوز

 

هەریەك لە وەزیری كار و وەزیری كاروباری شەهیدانی حكومەتی هەرێمی كوردستان ڕادەسپێردرێن لەگەڵ هاوتاكانیان لە عێراق گفتوگۆ بکەن بۆ هاوتاكردنی مووچەی زیندانیانی سیاسی و كەسوكاری شەهیدان.

 

لێدوانی فەرمی: د.ئومێد سەباح، سەرۆکی دیوانی ئەنجوومەنی وەزیرانی هەرێمی كوردستان بە ئاڤا نیوزی ڕاگەیاند: " بابەتی هاوتاكردنی مووچەی زیندانیانی سیاسیی یەكێك بوو لەو بابەتانەی لە كۆبوونەوەی ئەنجوومەنی وەزاری عێراق بۆ ئابووری و ئەنجوومەنی ئابوری هەرێمی کوردستان گفتوگۆی لەسەر كرا، پێشووتریش وەزیری شەهیدان لەگەڵ سەرۆكوەزیرانی عێراق كۆبووەتەوە و بابەتەكەی باس كردووە".

 

لە بەشێکی دیکەی قسەکانیدا د. ئومێد سەباح گوتی، یەكێكی دیكە ئەو نادادیانەی لەگەڵ هەرێمی كوردستان دەكرێت، بابەتی مووچەی زیندانیانی سیاسی و كەسوكاری شەهیدانە، لە پارێزگاكانی عێراق كەسوكاری شەهیدان ماف و ئیمتیازاتێكی زۆریان هەیە، بەڵام هەرێمی كوردستان لەمەش بێبەش كراوە.

 

چی ڕوودەدات: داوا لە حکومەتی عێراق کراوە ئەوانەی بیمەی كار و كاروباری كۆمەڵایەتی وەردەگرن ئەوانیش هاوتا بكرێن. هەروەها هەردوو وەزیری كار و وەزیری شەهیدان ڕاسپێردراون لەگەڵ هاوتاكانیان لە عێراق لە پەیوەندی و گفتوگۆدا بن.