ئەمڕۆ مامۆستایانی وانەبێژ دەکرێنە گرێبەست

ئاڤا نیوز 

 

فەرمانی بە گریبەستبوونی مامۆستایانی وانەبێژ دەچێتە بواری جێبەجێکردنەوە و نوێنەری مامۆستایانی وانەىێژیش ئاماژە بە گرنگی بڕیارەکە دەکات.

 

چیرۆکی سەرەکی: ئەمرۆ وەزیری پەروەردەی حکومەتی هەرێمی کوردستان لیستی ناوی مامۆستایانی وانەبێژ دەباتە ئەنجوومەنی وەزیران و واژوو لەسەر بەگرێبەستبوونیان دەکرێت، دواتر لیستەکە دەچێتە وەزارەتی دارایی.

 

لێدوانی فەرمی: محەممەد کەمال، نوێنەری مامۆستایانی وانەبێژ لە سلێمانی، لە میانەی بەشداریکردنی لە بوڵتەنی هەواڵەکانی کاتژمێر 12:00ـی ئاڤا ڕایگەیاند: ڕەنگە ئەمشەو دوایین شەوی دڵەڕاوکێی مامۆستایانی وانەبێژ بێت، هاوکات وەزیری پەروەردە لیستی مامۆستایانی وانەبێژ دەباتە ئەنجوومەنی وەزیران، لەوی واژوو دەکرێت و مووچەکانی مامۆستایانی وانەبێژ دەبەسترێت.

 

زانیاریی زیاتر: نوێنەری مامۆستانی گرێبەست ئاماژەی بەوەشکرد:  لە 16-9 ئیتر مامۆستایان لەنێو پرۆسەی خوێندندا ساڵێکی پڕ لە ئارامی دەستپێدەکەن، هاوکات بە گریبەستبوونی مامۆستایان قۆناغێکی گرنگە، بۆیە بە دڵنیاییەکی زیاترەوە دەگەڕێینەوە بەر خوێندن.

 

باکگراوند: سەرۆکوەزیران مەسرور بارزانی لە ماوەی ڕابردوودا لەگەڵ نوێنەرانی مامۆستایانی وانەبێژان کۆبووەوە، بڕیاریدا مامۆستایان لەسەر داهاتی ناوخۆ بکرێنە گرێبەست، کە ژمارەیان نزیکەی 38 هەزار کەسە.