فەرمانی دامەزراندنی مامۆستایانی وانەبێژ واژۆ کرا

ئاڤا نیوز 

 

فەرمانی دامەزراندنی مامۆستایانی وانەبێژ لە قوتابخانەکان لە ئەنجوومەنی وەزیران واژۆ کرا و لەگەڵ لیستی ناوەکانیان ئاراستەی وەزارەتی دارایی کرا بۆ بەستنی مووچە بۆیان.

وێنە گەورەکە: ئەمڕۆ دووشەممە د.ئالان حەمە سەعید، وەزیری پەروەردە و کارۆخ عەبدوڵڵا، نوێنەرانی مامۆستایانی وانەبێژ بۆ تەواوکردنی ڕێکارەکانی دامەزراندنی مامۆستایانی وانەبێژ لەگەڵ د. ئومێد سەباح، سەرۆکی دیوانی ئەنجوومەنی وەزیران کۆبوونەوە.

نووسراوی فەرمی: ئەنجوومەنی وەزیران بە واژۆی د.ئومێد سەباح نووسراوی فەرمی بۆ دامەزراندنی وانەبێژان و لیستی ناوی وانەبێژانی ئاراستەی وەزارەتی دارایی و ئابووری کردووە. لە نووسراوەکەدا ئاماژە بەوە کراوە ڕێککارەکانی دامەزراندنیان تەواو بکرێت و لە 1-9-2024 ەوە بکرێنە گرێبەست.

لەلایەکی دیکەوە: کارۆخ عەبدوڵڵا، نوێنەری مامۆستایانی وانەبێژ بە ئاڤا نیوزی گوت، "لە وەزارەتی دارایی تەرخانی دارایی بۆ مامۆستایانی وانەبێژ کراوە و بۆ مووچەی مانگی نۆ مووچە بە گرێبەست وەردەگرن". وانەبێژان شایستە دارایی مانگەکانی شەش، حەوت و هەشتیان وەرنەگرتووە و  بە شێوازی پێشوو وەریدەگرن.

گۆشەیەکی دیکە:  لەدوای 2014 نزیکەی هەزار و 500 وانەبێژ بەهۆکاری جیاواز لە ئەرکەکەیان دابڕاون، وەزیری پەروەردە ڕەزامەندی دەربڕیوە بۆ ئەوەی بە گوێرەی پێویست ئەو وانەبێژانە بەگرێبەست بکرێن و لە ناوەندەکانی خوێندن وانە بڵێنەوە.

ئەوەی پێویستە بیزانیت: ژمارەی مامۆستایانی وانەبێژ لە هەرێمی کوردستان نزیکەی 38 هەزار کەسە و  مووچەیان بە گوێرەی بڕوانامەکانیان زیاد دەکرێت، بڕوانامەی دیبلۆم 400 هەزار دینار و بەکالۆریۆس 500 هەزار دینار دەبێت.