دادگای فیدڕاڵی بڕیاردان لەبارەی زەویی جووتیارانی کورد دوادەخات

ئاڤا نیوز

 

دادگای باڵای فیدڕاڵیی عێراق بڕیاردان لە هەڵوەشاندنەوەی بڕیارەکانی ئەنجوومەنی سەرکردایەتی شۆڕشی هەڵوەشاوەی بەعسی دواخست.

 

چیرۆکی سەرەکی: بەگوێرەی خشتەی کۆبوونەوەکانی دادگای فیدراڵی، بڕیاربوو ئەمڕۆ سکاڵای بەشێک لە جووتیارانی کورد و پێکهاتەکانی دیکە تاوتوێ بکرێت، کە داوایان کردووە بڕیارەکانی ڕژێمی پێشووی عێراق سەبارەت بە گەڕاندنەوەی موڵکایەتیی بۆ خاوەنە ڕەسەنەکانیان بە نادەستووری لەقەڵەم بدرێت.

 

وێنە گەورەکە: بەگوێرەی بڕیارەکانی ئەنجوومەنی سەرکردایەتیی شۆڕشی هەڵوەشاوە، بەشێک لە زەوییە کشتوکاڵییەکانی جووتیارانی کورد و تورکمان و پێکهاتەکانی دیکە لە کەرکووک و پارێزگاکانی دیکەی عێراق، لە خاوەن زەوییەکان وەرگیراونەتەوە و موڵکایەتییان دراوەتە دەست وەزارەتی دارایی.

 

زانیاریی بەدەستهاتوو: دەروون مەلا ناجی، پەیامنێری ئاڤا لە بەغدا ڕایگەیاند: دادگای باڵای فیدڕاڵی عێراق بڕیاردان لەبارەی ئەم کەیسە بۆ ڕۆژی 13- 11-2024 دواخست.

 

باکگراوند: لە سەردەمی حکومەتی بەعسدا زیاتر لە ملیۆنێک و 200 هەزار دۆنم زەویی کورد و تورکمان بە بڕیارەکانی کاروباری باکوور و ئەنجوومەنی باڵای شۆڕش لە خاوەنە ڕەسانەکانیان وەرگیران و درانە عەرەبی ھاوردە. ئەوەش بڕیارێک بوو تاوەکو ئەمڕۆش جووتیارانی کورد و تورکمان بەدەستییەوە دەناڵێنن.