لە سەیدسادق چوار کەس بەتۆمەتی گەڕان بەدوای شوێنەوار دەستگیرکران

ئاڤا نیوز

 

پۆلیسی سەیدسادق چوار تۆمەتبار دەستگیر دەکات، کە لە حەوشەی ماڵێک سەرقاڵی هەڵکۆڵین بوون بۆ گەڕان  بەدوای شوێنەوار.

وێنە گەورەکە: شوێنەوارەکان جگە لە بەها مێژووییەکانیان، بازرگانیان پێوە دەکرێت و بە پارەی زۆر دەفرۆشرێن، ئەمەش وا دەکات خەڵکانێک هەوڵی بەدەستهێنانی بدەن.

 

لێدوانی فەرمی: سەرکەوت ئەحمەد، گوتەبێژی پۆلیسی سلێمانی بە ئاڤا نیوزی ڕاگەیاند: "چوار کەس کە ئەندامی یەک خانەوادەن، حەوشەی ماڵی خۆیان 10 مەتر هەڵکۆڵیوە، دواتر لە شێوەی پیتی ئێڵی ئینگلیزی (L) هەڵکۆڵینیەکەیان کردووە و هیچ شوێنەوارێکیان نەدۆزیوەتەوە، بەڵام نزیکبوون لەوەی شوێنەوار بدۆزنەوە."

 

ئەوەی پێویستە بیزانیت: لێکۆڵینەوە لە کەیسەکە بەردەوامە و گوتەبێژی پۆلیس دەڵێت لەوە دەچێت تۆمەتباران نەخشەیان لابووبێت بۆ گەڕان بەدوای پارچەی شوێنەواریی.

 

زانیاریی زیاتر: ئەوانەی دەستگیرکراون تەمەنیان لەنێوان 23 بۆ 34 ساڵە، تۆمەتباران بەگوێرەی ماددەی 24 بڕگەی چوار لە یاسای ژمارەی پێنجی ساڵی 2001ـی شوێنەوار ڕاگیراون. 

 

ئەمەش بزانە: دوو ساڵ لەمەوبەر پۆلیسی سەیدسادق لە گوندی سەراو باندێکی سێ کەسیان دەستگیر کردبوو کە بەدوای شوێنەواردا گەڕابوون.