مەندەلاوی سەرۆکایەتی کۆبوونەوەی لیژنەی ماددەی 140 دەکات

ئاڤا نیوز

 

سەرۆکی پەرلەمانی عێراق بەوەکالەت سەرۆکایەتی کۆبوونەوەی لیژنەی ماددەی 140ی کرد و جەختی کردەوە کە پێداگرە لەسەر دەرچوواندنی ئەو یاسایانەی بەهۆیەوە ماف بۆ جووتیاران و هاووڵاتیانی ناوچەکانی سنووری ماددەی 140 دەگەڕێنرێتەوە.

 

وێنە گەورەکە: ئێستا یاسای گەڕاندنەوەی مووڵک بۆ جووتیارانی کورد و تورکمان کە بەهۆی بڕیارەکانی حیزبی بەعسی هەڵوەشاوە لێیان زەوتکرابوو، لە پەرلەمانە و دەنگدانی کۆتایی ماوە، کورد داوای پەسەندکردنی دەکات و بەشێک لە پێکهاتەی عەرەبیش تێبینییان لەسەر پڕۆژەیاساکە هەیە.

 

ڕاگەیێنراوی فەرمی: موحسین مەندەلاوی، سەرۆکی پەرلەمانی عێراق بەوەکالەت و هادی عامری، سەرۆکی لیژنەی حکومی بۆ جێبەجێکردنی ماددەی 140 بە ئامادەبوونی ئەندامانی لیژنەکە کۆبوونەوە و باسیان لە قۆناغەکانی جێبەجێکردنی ئەو ماددەیەی دەستوور کرد بە هەماهەنگی لەگەڵ وەزارەتە پەیوەندیدارەکان.

 

لە کۆبوونەوەکەدا سەرۆکی پەرلەمانی عێراق بەوەکالەت جەختی کردووەتەوە، پەرلەمان لەبارەی مافی جووتیاران بە ئاراستەی هەڵوەشاندنەوەی بڕیارەکانی بەعسی هەڵوەشاوە هەنگاو دەنێت، چونکە بە گەڕاندنەوەی ماف بۆ ئەوانەی ستەمییان لێکراوە ئارامی ئەمنی، سیاسی و کۆمەڵایەتی بەهێزتر دەبێت.

 

مەندەلاوی ئەوەشی خستووەتەڕوو، پارێزگای کەرکووک لە جێبەجێکردنی یاسای گەڕانەوەی زەوییە کشتوکاڵییەکاندا تایبەتمەندی خۆی هەیە، بۆ پاراستنی ئارامی پارێزگاکەش پێویستە هەماهەنگی لەنێوان سێ سەرۆکایەتییەکە هەبێت و ڕەچاوی دۆخی  هەستیاری شارەکەش بکرێت.