كێشەی ئاوی قوشتەپە چارەسەر دەکرێت

ئاڤا نیوز

 

پرۆژەی ئاوی قوشتەپە بە گوژمەی 189 ملیار و 670 ملیۆن دینار دادەنرێت و بەمەش کێشەی ئاوی قەزای قوشتەپە و گوندەکانی دەورووبەری چارەسەر دەکرێت.

 

وێنە گەورەکە: ئەمڕۆ سێشەممە، سەرۆکوەزیران مەسرور بارزانی  بەردی بناغەی پرۆژەی ئاوی قوشتەپە دانا، بە تەواوکردنی پرۆژەکەش دەیان بیر لە ناوچەکە کە قووڵترین بیرن لەسەر ئاستی عێراق دادەخرێن.

 

لێدوانی فەرمی: ساسان عەونی، وەزیری شارەوانی و گەشتوگوزاری حکومەتی هەرێمی کوردستان ڕایگەیاند:  پرۆژەی ئاوی قوشتەپە و دەورووبەری، توانای بەرهەمهێنانی 3 هەزار مەتر سێجا ئاوی هەیە لە کاتژمێرێکدا، ڕۆژانە 72 ملیۆن سێجا ئاو بەرهەم دەهێنێت، ئەم پرۆژەیە دەبێتە هۆی داخستنی دەیان بیر لە ناوچەکە کە قۆڵاییان گەیشتووەتە زیاتر لە 730 مەتر. 

 

ژمارەکان وا دەڵێن: 51 هەزار هاووڵاتی لە قووشتەپە و بێستانە و 60 گوندی دەورووبەری لەم پرۆژەیە سوودمەند دەبن، ئەم پڕۆژەیە کاریگەری ئەرێنی لەسەر ناوچەکە دەبێت و ڕەچاوی فراوانبوونی ناوچەکەش کراوە.

 

ئەمەش بزانە: پرۆژەکە چەندین تایبەتی هەیە، وەک وێستگەی خاوێنکردنەوە ئاو بە چوار قۆناغ، بەرزکەرەوەی ناوەندی، سێ کۆگا بە قەبارەی 5 هەزار مەتر سێجا، بۆریەکەی 38 کیلۆمەت درێژە بە تیرەی 900 ملیمەتر، هاوکات بۆ بەستنەوەی بە تۆڕی ئاوی قوشتەپە 80 هەزار بۆڕی مەتری پێویستە.